КЫДЗИ СССР-са УДЖАЛЫСЬ ЙӦЗ КУТАСНЫ ВӦЧНЫ ВЫЛЬ ОЛӦМ

Коммунист партиялӧн 14-ӧд съезд шуис: Сӧветскӧй Союзын позьӧ стрӧитны социализм. Социализмӧн шусьӧ сэтшӧм олӧм, кор йӧзыс оз торйӧдчыны рабочӧй, крестьяна, буржуй да мукӧд пӧлӧс классъяс вылӧ; кор вылын техника вылӧ пыксьӧ став кӧзяйствоыс. Став уджсӧ кутасны вӧчны машинаяс пар вынӧн да электричество вынӧн.

Съезд вылас муніс ыджыд вензьӧм. Ёртъяс Зиновьев, Евдокимов, Сокольников да мукӧд вӧлі шуӧны: асланым СССР-са уджалысь йӧз нажӧтка вылӧ пӧ огӧ вермӧ стрӧитны выль пабрик-заводъяс, бурджыка лӧсьӧдны видз-му уджалӧм. Мӧд мувывса нажӧткатӧг бур олӧм пӧ лӧсьӧдны огӧ вермӧ.

Неважӧн на помасис ӧтувъя пленум Партияса Центральнӧй Комитетлӧн да Центральнӧй Контрольнӧй Комиссиялӧн. Пленум уджаліс партияса съезд шуӧмъяс кузя. Зиновьев ёртӧс партиялы паныд мунӧмысь чӧвтісны Политбюроса шленысь (медыджыд учрежденньӧ партиялӧн).

Оппозициялӧн (сідзи шуӧны политикаын паныд мунысьясӧс) абу надея СССР-са рабочӧй да крестьяна вын вылӧ.

СССР пыр кутас лэптыны революция. СССР-са уджалысь йӧз воча кок кутасны мунны мӧд муса уджалысь йӧзкӧд. Капиталистъясӧс шыбитны мӧд муса уджалысьяс ӧні оз на вермыны. Лоӧ виччысьны. Сійӧ кадӧн СССР кутас ачыс аслас вынӧн вӧчны выль олӧм.

Миян партия да сӧвет власьт пыксьӧ уджалысь йӧз вылӧ. Партия шуис: СССР-са рабочӧй да крестьяна ӧтув партияӧн чуйдӧдӧм кузя вермасны стрӧитны выль олӧм.

Выль олӧм вӧчны колӧ уна сьӧм. Мӧд муса буржуйяс сьӧмсӧ оз сетны. Найӧ, дерт, оз кутны лэптыны медводдза государство уджалысь йӧзлысь.

Партияса съезд шуис: колӧ чорыда кутчысьны став СССР кузя чӧжны сьӧм. Партия шуӧм кузя Сӧвет власьт лэдзис декрет (закон): став учрежденньӧяслы, организацияяслы, пабрик-заводъяслы оз позь видзны ни ӧти грӧш не колан рӧскод вылӧ. Мед быд кӧпейка, быд шайт веськалас кӧзяйство лэптӧм вылӧ.

Ӧні уна пӧлӧс тӧваръяс да машинаяс вайӧны заграничаысь. Партия шуис: став тӧварсӧ, сідзжӧ машинаяс заводитны вӧчны асланым сӧветскӧй пабрик-завод вылын.

Быд уджалысь гӧгӧрвоысь морт шуас: коммунист партия веськыда индӧдлӧ; оз ков мукӧд муса буржуйясӧс озырмӧдны миян заказъясӧн.

СССР некодлы оз кут копрасьны да корны отсӧг. СССР ачыс кутас озырмыны да ёнмыны. Германия, Франция да мукӧд посни государствояс моз оз мун поклон вылӧ америкаса да мукӧд муса буржуйяс дорӧ. СССР ачыс аслас вылын кӧзяин.

Сьӧм чӧжны, выль олӧм вӧчны сӧвет власьт да партия ӧтнаныс, дерт, оз вермыны. Налы колӧ отсӧг став рабочӧйсянь да крестьянасянь.

Пабрик-заводъясын рабочӧйяс ёна нин дӧзьӧритӧны став рӧскод вӧчӧм бӧрысь. Миян Коми обласьтын крестьяналы сідзжӧ колӧ видзӧдны исполкомса, кооперацияса да мукӧд учрежденньӧясса уджъяс бӧрся. Мед весьшӧрӧ оз торксьы ни ӧти кӧпейка. Мед исполкомъяс да мукӧд учрежденньӧяс бурджыка уджаласны, крестьяналысь интересъяссӧ ёнджыка доръясны.

Коми обласьтлы оз ков кольччыны мӧд сӧветскӧй йӧз дорысь. Став уна кывъя сӧветскӧй мувывса йӧз ӧтувйӧн вӧчасны выль долыдджык олӧм.