КОЛӦ РАЙОНИРУЙТЧЫНЫ
Районированньӧ вӧчсьӧ сы вӧсна, мед эськӧ ӧтувтны аслыныс пӧлӧс овмӧс чукӧръяс (районъяс), сійӧ районъяс серти лӧсьӧдны меставывса власьт, матыстны сійӧс меставывса овмӧс дінас. Тӧдса, матысса власьт, дерт, бурджыка вермас дӧзьӧритны да паськӧдны меставывса овмӧс.
Меставывса овмӧс нуӧдӧм кузя во куим-нёль сайын ми кӧсйылім ӧтувтчыны Кардор (Архангельск) да мукӧд маті губерняяскӧд. Заводитім сёрнитны кардорсакӧд, бурджыка пондім мӧвпавны накӧд ӧтувтчӧм йылысь. Сэні сэсся аддзыны кутім — накӧд ӧтувтчыны ӧти Асъя-Войвыв (Северо-Восточной) обласьтӧ миянлы оз позь: сэки миян асланым меставывса овмӧс нуӧдӧмын вермис лоны сӧмын сьӧктӧд. Та йылысь дыр сёрнитім кардорсакӧд. Сӧмын таво, май 5-ӧд лунӧ, Став Россия пасьта Шӧрса Комитетлӧн президиумыс шуис миянӧс не ӧтлаавны некодкӧд, сетны миянлы аслыным меставывса овмӧс нуӧдны.
Став Россия пасьта Шӧрса Комитет президиумлӧн тайӧ шуӧм серти, миянлы аслыным колӧ ыджыдджык власьтӧн нуӧдны меставывса овмӧс. Миян меставывса власьтлы колӧ матысмыны ӧнія вӧлӧсьтъяс, сиктъяс бердӧ; колӧ власьтыслы лӧсьӧдавны овмӧс чукӧръяскӧд (районъяскӧд): дженьыда кӧ шуны — колӧ районируйтчыны.
Медвойдӧр, миян думысь, колӧ артавны обласьтпытшса районъяс лӧсьӧдӧм йылысь. Гырысьӧс-ӧ посньыдӧс-ӧ найӧс вӧчны; артавны, кутшӧм налӧн колӧ лоны власьт. Сы серти, кыдзи арталӧ районъяс лӧсьӧдны Став Россия пасьта Шӧрса власьт, мукӧдлаын районируйтчӧмъяс серти, районъяслӧн власьт лои ӧнія уезд (карув) власьт кодь кымын.
Миян обласьтувса праваяс районируйтчигӧн колӧ паськавны. Ӧнӧдз миян права вӧлі губерняяслӧн кодь кымын. Районируйтчӧм бӧрын праваяс колӧ лоны сыысь ыджыдджык, мед ми вермим ылӧ ветлытӧг да ылысь юасьтӧг вӧчны да лӧсьӧдны коланторъяс.
Районируйтчигӧн лоӧ кыпӧдны сёрни миян обласьт граничаяс йылысь. Миян граничаяс ӧнӧдз вӧлі мукӧдлаӧдыс торйӧдӧны местаяс ӧти овмӧс чукӧрысь (районысь). Быдсӧн тӧдӧны, оз позь торйӧдны Сыктывкар да Выльгорт, Слӧбӧда да Зеленеч. А граничаясӧн сы ног торйӧдӧмъяс ӧнӧдз эмӧсь на. Районируйтчигӧн граничаяссайса местаяссӧ ковмас пыртны ӧти гранича пытшкӧ.
М. Попов.
