ЕВРОПАСА КАПИТАЛИСТЪЯСЛЫ ТУРЦИЯ ДА ПЕРСИЯ КОСТ ДОГОВОР СЬӦЛӦМ ВЫЛАС ЭЗ ВО

Турция да Персия неважӧн вӧчисны договор мӧда-мӧднысӧ не вӧрзьӧдӧм йылысь (войнаӧн не сувтны). Сійӧ договорас эм ӧти статья, кӧні шуӧма не лэдзны некоднаныслы аслас государство пыр боки государствоса войскаяс, мунӧны кӧ найӧ кодныслыкӧ паныд войнаӧн.

Быттьӧкӧ Лига Нацийӧ пырысь государствояслы сӧмын колӧ радуйтчыны, со пӧ мир вӧчӧмаӧсь, оз кӧсйыны косясьны; найӧ ӧд йӧзсяньыс пыр мир йылысь сёрнитӧны.

Вӧлӧмкӧ, капиталистъясыдлы тайӧ договорыд зэв сьӧлӧм вылас оз во.

Мый вӧсна капиталистъяслы договорыс оз во сьӧлӧм вылас, гижӧ англияса газет «Дэйли телеграф». Сійӧ гижӧ, лоӧ кӧ пӧ зык Турция да Лига Наций кост, сэки пӧ тайӧ договор сертиыд Персияыд ас пырыс оз лэдз нуны войска Турция вылӧ.

Лига Нацияс ставнас бергӧдлӧ Англия, сідзкӧ сійӧ лӧсьӧдчӧ на коркӧ кежлӧ косясьны Турциякӧд.

Сэсся водзӧ газетыс гижӧ, тайӧ Турция да Персия договор серти пӧ вермас вӧчны Германия. Сійӧ пӧ СССР-кӧд вӧчліс жӧ договор мӧда-мӧдӧс не вӧрзьӧдӧм йылысь. Ӧні пӧ Германияыс, война кӧ лоӧ СССР-кӧд, оз жӧ пӧ кут лэдзны мукӧд государствоса войскаяс ас пырыс. Сідзкӧ, англияса капиталистъяс абу на жӧ эновтӧмаӧсь думсӧ войнаӧн мунны СССР вылӧ.

Европаса капиталистъясӧн тайӧ договор вылӧ видзӧдӧмыс петкӧдлӧ, мый мир йылысь налӧн сёрнитӧм сӧмын рабочӧйяссӧ да крестьянасӧ ылӧдлӧм. Найӧ синнас оз вермыны видзӧдны СССР вылӧ, сійӧ пыр зільӧ быдӧнкӧд мирӧн овны да. Турция да Персия кост договор мир йылысь налы оз жӧ кажитчы. Зычитны кӧ найӧ кутасны, капиталистъяслы регыдджык лоӧ босьтны найӧс ас кипод улас.