КОММУНИСТ ПАРТИЯ ЦЕНТРАЛЬНӦЙ КОМИТЕТЛӦН ДА ЦЕНТРАЛЬНӦЙ КОНТРОЛЬНӦЙ КОМИССИЯЛӦН ПЛЕНУМ

Юль 14-ӧд лунсянь юль 23-ӧд лунӧдз Мӧскуаын муніс Коммунист партия Центральнӧй Комитетлӧн да Центральнӧй Контрольнӧй Комиссиялӧн пленум. Пленум вылын сёрнитісны зэв унатор йылысь, решитісны уна гырысь вопросъяс. Сёрнитісны государствоса овмӧс нуӧдӧм-кыпӧдӧм йылысь, политика кутӧм йылысь, коммунист партия пытшкӧсса оласног йылысь. Ёна сёрнитісны Сӧветъясӧ бӧрйысьӧм йылысь, арталісны важ ӧшыбкаяссӧ Сӧветъясӧ бӧрйысьӧм удж нуӧдігас да корсисны туйяссӧ водзӧ кежлӧ сійӧ ӧшыбкаяссӧ не вӧчны. Пленум шуис, партия пӧ мунӧ веськыд туйӧд Сӧветъясӧ бӧрйысьӧм удж нуӧдӧмын, водзӧ пӧ сідзжӧ колӧ тайӧ уджсӧ нуӧдны, кыскыны сэтчӧ унджык гӧль крестьянаӧс да батракъясӧс. Пленум вылын сёрнитісны ёна выль урожайысь нянь чукӧртӧм йылысь. Пленум сетіс индӧдъяс, кыдзи выль урожайысь босьтны медыджыд пӧльза став Сӧвет Союзлы.

Сэсся пленум кывзіс доклад ӧткымын коммунистъясӧн коммунист партияыслы да сійӧ Центральнӧй Комитетыслы паныд мунӧм йылысь. Ӧткымын коммунистъяс — Зиновьев, Лашевич да ещӧ кодсюрӧ — коммунист партия 14-ӧд съезд вылын на паныд сувтлісны съездыслы: найӧ вӧлі ӧткымынтор йылысь (СССР-ын промышленносьт сувтӧдӧм йылысь, Сӧвет Союзын социализм лӧсьӧдӧм йылысь мӧд ногджык вӧлі мӧвпалӧны, кулакъяс вылӧ да шӧркоддьӧма олысь крестьяна вылӧ бара мӧд ног видзӧдӧны, оз сідзи, кыдзи став съездыс) мӧд ног думайтӧны да ас ног думайтӧм сертиыс вӧлі уджсӧ водзӧ тшӧктыны кӧсйӧны нуӧдны став коммунист партияыслы. Сӧмын 14-ӧд съезд шуис, мый сійӧ йӧзыс мӧд ног, оз лючки гӧгӧрвоны кытсюрӧ, да индіс веськыд туй, кыдзи колӧ уджавны став коммунист партия вылӧ.

Миян коммунист партияын позьӧ быд шленлы ас ногыс мӧвпавны да аслас мӧвпалӧм сертиыс мыйсюрӧ дорйыны, шуам, съезд вылын, а съездыс кӧ вӧчас сы йылысь постановленньӧ, став коммунистыслы лоӧ уджавны сійӧ постановленньӧ сертиыс. Сійӧн миян коммунист партия вӧлі пыр ён, сійӧн быдлаын коммунист партия уджаліс пыр вывті ӧтув. Коммунист партиялӧн 14-ӧд съездыс сідзжӧ шуис, Зиновьев, Лашевич да ӧткымын мукӧд коммунистъяс пӧ мӧвпалӧны абу дзик лючки, колӧ пӧ вӧчны мӧд ног. Коммунист партия эз ёна мыжав тайӧ ёртъяссӧ: быдӧн вермӧны ылавлыны, мӧд ног думайтлыны. Съезд весиг найӧс колис ответственнӧй уджъяс вылӧ.

Сӧмын Лашевич, Зиновьев, Беленькӧй да ӧткымын мукӧд и съезд бӧрас кутісны ассьыныс уджсӧ водзӧ нуны.

Найӧ вӧлӧм зільӧны лӧсьӧдны торъя на дор сулалысь организацияяс, чукӧрталӧны вӧлӧм гусьӧн партиясьыс собранньӧяс, кӧні вӧлӧм чуксалӧны ӧтувтчыны водзсасьны коммунист партияыскӧд да сійӧ Центральнӧй Комитеткӧд. Тайӧ йӧзыс Коммунист Интернационал Исполком пыр (сэні председательыс Зиновьев) весиг мукӧд государствоса коммунист партияяссӧ вӧлӧм зільӧны сувтӧдны паныд Став Сӧвет Союзса коммунист партиялы.

Татшӧм уджыс торъя ёртъяслӧн сӧмын омӧльтчӧдӧ коммунист партиясӧ. Коммунист партия, ещӧ Ленин ёрт велӧдӧм серти на, чорыда косясьӧ татшӧм йӧзыскӧд. Пленум шуис: Зиновьев ёртӧс чӧвтны Центральнӧй Комитетбердса Политбюро шленысь. Сійӧ пӧ юрнуӧдысьыс тайӧ партиялы паныд удж нуӧдысь йӧз пӧвстас да, оз пӧ вермы лоны Политбюроын шленын. Лашевичӧс (Центральнӧй Комитетын кандидат) пленум шуис чӧвтны Коммунист Партия Центральнӧй Комитетса кандидатсьыс дай Реввоенсӧветын председательӧс вежысь (заместителя) удж нуӧдӧмысь. Сы кындзи, пленум шуис не сетны Лашевичлы кык во чӧж ответственнӧй партияса удж нуны, а кутас кӧ водзӧ тадз жӧ уджавны, вӧтлыны дзикӧдз партиясьыс.

Мукӧд мыжаяс кузяыс пленум шуис вӧчны Коммунист Партия Центральнӧй Контрольнӧй Комиссияса Президиум постановленньӧ серти (постановленньӧ вӧлі юнь 12-ӧд лунын).

Партиялы паныд сувтысь йӧзлы некутшӧм коммунист партияса организацияын эз отсавны. Сӧмын дыр кӧ та ногнад заводитасны уджсӧ нуӧдны партия пытшкад, партияыс вермас омӧльтчыны, торъявны. Коммунист партия паныд сувтысь йӧзкӧд кутас чорыда водзсасьны.

Партия миян ён сӧмын аслас дисциплинанас, аслас ӧтув уджалӧмнас.