МЫЙ ШУИС ОБИСПОЛКОМЛӦН ПЛЕНУМ

Юнь тӧлысь помын Сыктывдінкарын муніс Обласьтувса Исполнительнӧй Комитетлӧн Пленум. Обисполкомса шленъяс да Обласьтувса учрежденньӧясӧн заведуйтысьяс кындзи, пленум вылын вӧліны кӧкъямыс волисполкомса председатель.

Вӧлі пуктӧма докладъяс Обласьтувса, Емдін уездувса, сэсся От вӧлӧсьтувса исполкомъяс удж йылысь. Таысь кындзи, вӧліны докладъяс: тавося сельскокӧзяйственнӧй налог, крестьяналы видз-му лӧсьӧдӧм (землеустройство), крестьяналы вӧр торйӧдӧм, колян вося Обласьтувса бюджет. Медся ёна Пленумлы вӧлі колӧ тӧдмавны, кутшӧма да кыдзи уджалӧны миян учрежденньӧяс 5-ӧд Обласьтувса Сӧветъяс Съезд туйдӧдӧм сертиыс. Обласьтувса исполком удж йылысь висьталіс Обисполкомса председатель Мишарин ёрт. Медся ёна Мишарин ёрт висьталіс исполкомъяслысь уджсӧ, видз-му уджалӧм, вӧр уджалӧм. Вӧлӧсьтувса исполкомлӧн удж ньӧжйӧникӧн бурмӧ. Крестьяна Сӧветъяс бӧрйӧм вылӧ видзӧдӧны бура, бӧрйисны волисполкомъясӧ прамӧйджык йӧзӧс. Эмӧсь на, дерт, исполкомъяс уджын и омӧльторъясыс, кодъясӧс колӧ бырӧдны.

Видз-му уджалӧм да скӧт видзӧм воысь воӧ кыпалӧ. Обласьтувса исполком мый вермӧ отсалӧ кыпалӧмлы. Паськалӧ нюръяс косьтан удж. Кӧдза кежлӧ кӧйдыс вӧлі заптӧма водзвыв: кӧдзтӧг муяс эз кольны. Вӧр уджалӧм таво муніс бура. Сӧмын сёрӧн заводитӧм вӧсна мукӧд вожас эз вермыны лӧсьӧдныс ставсӧ.

Доклад кузя сёрнитӧм мысти пленум Обласьтувса Исполкомлысь удж нуӧдӧм шуис правильнӧйӧн. Пленум водзӧ кежлӧ Обисполкомлы тшӧктіс ёнджыка тӧдмавны му пиысь озырлун, паськӧдны заводъяслысь удж, бурмӧдны сортӧвӧй лэдзӧм, ёнджыка чуйдӧдны волисполкомъясӧс. Таысь кындзи, пленум тшӧктіс паськӧдны мукӧд пӧлӧс уджъяс.

Емдін уездувса да От вӧлӧсьтувса исполкомъяс удж кузя пленум тшӧктіс ёнджыка тӧдмавны да туйдыны крестьяналысь овмӧс кыпӧдӧмсӧ, паськӧдны уджсӧ мӧда-мӧдлы отсасян комитетъяслысь да волисполкомса секцияяслысь, чукӧртны колян вося налогысь недоимкаяс.

Ёна пленум вылын сёрнитісны тавося сельскокӧзяйственнӧй налог йылысь. Нажӧткаысь налог босьтӧмӧн удж нуӧдӧмыс абу дзик кокни. Быд крестьянинлӧн аслас колӧ отсавны налогӧвӧй удж нуӧдігӧн. Пленум шуис: налог лӧсьӧдігӧн бура тӧдмавны быд кӧзяйство. Бокиса нажӧткаяс налог улӧ сюйны кӧзяйствояс вын серти, войдӧр тӧдмавны, уна-ӧ крестьяниныс босьтӧ доходсӧ видз-му уджалӧм помысь. Обисполкомса президиумлы пленум тшӧктіс корны Народнӧй Комиссаръяс Сӧветлысь, медым медбӧръя налог мынтан сроксӧ май первойся лунысь нюжӧдасны юль первой лунӧдз.

Крестьяналы видз-му лӧсьӧдӧм кузя (землеустройство кузя) Пленум тшӧктіс ёнджыка паськӧдны обласьтпытшкӧсса переселяйтчан удж, отсавны мӧд местаӧ мунысьяслы сьӧмӧн. Мукӧд губерняӧ мунӧмъяс помасясны сэки, кор паськалас Обласьт пытшкӧсас переселенньӧыс.

Медым бура нуӧдны видз-му лӧсьӧдӧм удж, колӧ содтыны землемеръясӧс. — Та кузя Пленумыс тшӧктіс шыӧдчыны видз-му уджалан Комиссариатӧ, медым сійӧ сетас быд куим вӧлӧсьт вылӧ землемерӧс. Водзӧ кежлӧ Пленумыс тшӧктіс ёнджыка паськӧдны нюръяс косьтӧм, видз-му бурмӧдӧм.

Крестьяналы вӧр торйӧдӧм йылысь сідзжӧ ёна сёрнитісны, Пленум шуис: ёнджыка крестьянаӧс тӧдмӧдны тайӧторнас. Кутшӧм вӧлӧсьтъясын ӧні мунӧ видз-му лӧсьӧдан удж — ӧтпырйӧ нуны и вӧр торйӧдӧм. Медым крестьяналы сюрӧ бурджык вӧра местаяс, колӧ пӧ сетны обществояслы бӧрйыны аслыныс.

Пленум обласьтувса учрежденньӧяслы, тшӧтш уездувса исполкомъяслы индіс водзӧ кежлӧ уджъяс.

Акинь пи.