КОМИ ЧАСТУШКАЯС

 

Сарай вылын уна тьӧс,

Кирпичысь сьӧкыд абу,

Миян сиктын уна зон,

Милӧй вылӧ зон абу.

Зонъяс, сьылӧ, зонъяс, сьылӧ,

Зонъяс, веселитеся,

Сизимура тіян чена,

Зонъяс, не сердитеся.

Мӧдлапӧлын ыджыд мыр,

Быд мунысьӧс джӧмдӧдлӧ,

Миян сиктын ӧти ныв,

Став нывлысь лӧг петкӧдлӧ.

Кельыдлӧз сатин ньӧба,

Кык суда грибӧн вура,

Менам мусук талун волас,

Самӧкурӧн юктӧда.

Миян Эжва абу джуджыд,

Ме сартасӧн мерайта,

Менам мусук абу ылын,

Пемыдгорув котӧртла.

Эжва вылӧ видзӧдлан,

Став чери горув лэччӧ,

Сикт помланьыс видзӧдлан,

Став зонмыс милань локтӧ.

Ылын дорын, веж луд вылын,

Менсьым милӧй нӧйтӧны;

Нӧйтӧ кӧть ті лун и вой,

Век жӧ нин ме сы дорын.

Небесаын уна кодзув,

Шондіысь югыд абу;

Миян сиктын уна зон,

Мусукысь мича абу.

Неужели карӧй вӧв

Домӧд йывсьыс мынтӧдчас;

Неужели менам милӧй

Коркӧ менӧ вунӧдас.

Мыйла тэ нӧ, еджыд кыддзӧй,

Тӧврутӧм, а шумитан;

Мыйла тэ нӧ, менам сьӧлӧм,

Шог абу, а век висян.

Менам вӧлі эзысь чунькытш,

Пожъясигӧн вӧйӧма;

Менам вӧлі муса друг,

Война вылӧ усьӧма.

Милӧй, узян али он,

Лэдзлы менӧ, шонтыся;

Радейтан нин, али он,

Ме тай век на надейтча.

Миян шорын визыв ва,

Лӧсьыд сэні пожъясьны;

Зонъяс миян зэв мичаӧсь,

Позьӧ найӧс радейтны.

Сьӧлӧмӧй дай дӧрӧмӧй,

Ёна жӧ нин кӧтасин;

Мусаӧй да дроляӧй,

Век лун кежлӧ лӧгасин.

Ас сикт кузя ме муна,

Веськыдвылӧ видзӧдла;

Милӧй ордӧ ме пыра,

Кодлы меӧдз дела.

Неужели кыддзыс абу,

Лоӧ пипу керавны;

Неужели зонмыс абу,

Лоӧ дӧвеч любитны.

Ылӧ муні — кыддзыс сюри,

Эз ков пипу керавны;

Ылӧ муні — зонмыс сюри,

Эз ков дӧвеч любитны.

Милӧйӧй пӧ милӧйӧй,

Вышивайтӧм дӧрӧмӧй;

Вышивайтӧм дӧрӧмӧй —

Дай зарни тугъя кӧшельӧй.

Зарни тугъя кӧшельӧй —

Да куслытӧм ӧзъян сисьӧй.

Ӧзйин, ӧзйин дай кусін,

Радейтін дай пӧръёвтін;

Радейтін дай пӧръёвтін,

Дай кӧсйин вайны — эновтін.

Менам милӧй комсомолеч,

Богу не молится;

Без попа и без венца

Думает жениться.

Ӧшинь улын ыджыд кыдз,

Петӧма да керала;

Ӧшинь дорын ме петі,

Пырала да окала.

Гуляйтнысӧ мича ныв —

Да мича нывсӧ ме аддзи;

Мича нывсӧ ме аддзи

Да думайтчи кӧ гӧтрасьны,

Думайтчи ме гӧтрасьны

Да мамӧ оз мун корасьны;

Батьӧ менӧ гӧтралӧ,

Да мамӧ менӧ оз гӧтрав,

Мамӧ менӧ оз гӧтрав

Да салдатпу вылӧ видзӧ.