ЛОКТАН ВОЫН ВЕЛӦДӦМ УДЖ

 

Сӧвет власьт воысь воӧ эмбур-овмӧс ёнмӧдӧ да ёнмӧдӧ. Кутшӧм овмӧс тор он босьт, быдлаысь аддзан ёнмӧм да бурмӧм. Тшӧтш ёнмӧ да бурмӧ и йӧзӧс велӧдан удж.

Оз ёна бӧрӧ кольччы мукӧд государство серти и миян Коми Обласьт. Куш йӧз велӧдӧм серти позьӧ шуны: Коми обласьт водзӧ шаглалӧ.

Йӧз велӧдан юкӧдъяс (Обоно да УОНО) воысь воӧ тӧждысьӧны, кыдз-мый эськӧ удж пуктыны лючкиджык. Локтан во кежлӧ удж оз кӧсйы кусны, оз кӧсйы чинны, а пыр водзӧ кӧсйӧ паськавны да бурмыны. Босьтам бюджет.

 

Бюджет локтан во кежлӧ Обонолӧн.

 

Локтан во кежлӧ йӧз велӧдан удж вылӧ Обласьтувса бюджетысь кӧсйӧны сетны ӧти миллион кӧкъямысдас ӧти сюрс да кыксё квайт (1.081.206) шайт. Колян во серти унджык ӧкмысдас сюрс (90.000) шайт гӧгӧр.

Та бӧрти ещӧ Центр кӧсйӧ ас тшӧт вылас босьтны со кутшӧм учрежденньӧяс:

1) Педтехникум,

2) С.-коз. техникум,

3) Сӧвет партия уджӧ велӧдан школаяс,

4) Гырысь йӧзӧс велӧдан школаяс,

5) Яранъяс школа вылӧ.

Яранъяслы (самоедъяслы) школаяс восьтыны шуӧма со кутшӧм местаясӧ.

1) Петруньӧ — 20 морт вылӧ,

2) Югӧршарӧ — 20 морт вылӧ,

3) Ёгор Ваньӧ — 40 морт вылӧ,

4) новлӧдлан школа (передвижка).

 

Посни челядьӧс велӧдӧм.

 

Посни челядьӧс велӧдны Коми обласьтын неважӧн на заводитісны. Сідзкӧ этша на ещӧ восьталӧма челядь садъяс, площадкаяс да челядь керкаяс. Мӧд во кежлӧ содтыны оз жӧ кӧсйыны. Сӧмын площадкаяс кӧсйӧны неуна паськӧдыштны.

Кывтываысь (сэні эм челядьлӧн асланыс кар) Обоно кӧсйӧ неуна челядьӧс чинтыны. Колян во да таво вӧлі Кывтываын 250 морт. Локтан во кежлӧ кӧсйӧны кольны сӧмын 200 мортӧс, мукӧд челядьсӧ надейтчӧны бать-мам орданыс сетны.

Кылтовскӧй городокӧс Обоно кӧсйӧ буракодь ладмӧдны: мастерскӧйяс бурмӧдны дай восьтыны электрическӧй станция.

Уна на ещӧ эмӧсь миян «шляйтчысь» челядь. Сэтшӧм челядьсӧ, эськӧ, тшӧтш колӧ быд ног — кыдз шуасны — кок выланыс сувтӧдны да, Обонолӧн озджык судзсьы киыс дай сьӧм оз тырмы. Водзӧ кежлӧ колӧ ставнымлы ӧтвылысь босьтчыны лӧсьӧдны батьтӧм-мамтӧм челядьӧс. Обоно тадзикӧн жӧ мӧвпалӧ водзӧ удж нуӧдны.

 

Челядьӧс велӧдӧм.

 

Сӧвет власьт ёна тӧждысьӧ челядьӧс велӧдӧм вӧсна. Воысь воӧ Сӧвет власьт тшӧктӧм кузя ми матыстчам сэтшӧм кадлань, кор миян став челядьыс вермыны кутасны школаӧ ветлыны, кор став челядьӧс кутасны велӧдны.

Таво школаясын велӧдчисны сё пытшкысь сизимдас морт. Мӧд во кежлӧ колӧ содтыны кӧть кӧкъямысдасӧдз. Кыдзи тайӧ позьӧ? — Со кыдзи. Колӧ восьтыны ещӧ 31 комплект.

Обоно тадзи и мӧвпалӧ. Сійӧ кӧсйӧ восьтыны таво арын 31 комплект со кытчӧясӧ:

1) Сыктыв вожӧ — 9,

2) Эжва вожӧ — 9,

3) Емдін карулӧ — 8,

4) Изьва вожӧ — 5.

Гырысь школаяс локтан во кежлӧ Обоно оз кӧсйы содтыны. Сӧмын кык сыктывкарса семилетка переведитӧ вӧлӧсьтъясӧ: ӧтисӧ Шойнатыӧ, мӧдсӧ Паджгаӧ.

Тайӧ воясӧ колӧ неуна босьтчыны ёнмӧдны школаяс. Уна на ещӧ эмӧсь миян школаяс, кӧні и пуксьыныс челядьлы некытчӧ. Эмӧсь школаяс, кӧні оз тырмы книга, бумага, карандаш да мукӧдтор.

Оз позь ёна ошйысьны и велӧдӧм йылысь; эмӧсь и сэтӧні омӧльторъяс.

Медым водзӧ бурджык лоны кутіс школа, Обоно арсяньыс жӧ кӧсйӧ босьтчыны вӧчны со мый:

1) корны отсӧг гӧль велӧдчысьяслы,

2) нюжӧдны велӧдчан во,

3) нормаӧдз тыртны челядьӧн школаяс,

4) бурджыка дай унджык лӧсьӧдны книга-бумага,

5) ГУС-овскӧй программа бурджыка нуӧдны,

6) чинтыны удж школьникъяслысь семилеткаясын,

7) этшаджык лэдзны восьтавны кружокъяс,

8) водзӧ босьтчыны стрӧитны выль школаяс.

 

Мастерствоӧ велӧдӧм.

 

Таво вӧлі обласьт улын кык Педтехникум. Арсяньыс лоӧ сӧмын ӧти Педтехникум. Велӧдчысь лоӧ 280 морт. Мӧд во тулыс Педтехникум кӧсйӧ лэдзны 80 кымын учитель. Таво арын выль велӧдчысьӧс босьтасны Педтехникумӧ сӧмын 40 мортӧс.

Сельхоз. техникум босьтас выльысь 65 мортӧс; на пиысь 25 мортсӧ леснӧй отделенньӧӧ.

Октябр тӧлыссянь кымын Обоно чайтӧкодь восьтыны Сыктывкарын земельнӧй курсъяс, кӧні кутасны велӧдны кык во. Таво босьтасны 40 мортӧс, коді бура велӧдчис шӧръя (средньӧй) школаясын.

Таво жӧ арсяньыс Изьваӧ восьтӧны профшкола, кӧні кутасны велӧдны столярӧ, слесарӧ да кузнечӧ.

 

Гырысь йӧзӧс велӧдӧм.

 

Локтан во кежлӧ колӧ босьтчыны ёнмӧдны удж лыддьысян керкаясын да гӧрд пельӧсъясын.

Медым кокниджык лоӧ нуӧдны удж сиктъясын, Обполитпросвет кӧсйӧ таво кежлӧ содтыны 10 уджалысь мортӧс; сідзи жӧ кӧсйӧ ёнмӧдны удж опорнӧй лыддьысян керкаясын.

Кӧсйӧны таво 5000 верстьӧ йӧзӧс велӧдны грамотаӧ. Сы понда восьталасны вӧлӧсьтъясын школаяс гырысь йӧзлы; тшӧтш пондасны велӧдны найӧс и ӧтикӧн-ӧтикӧн. Быд велӧдчӧм морт вермас велӧдны велӧдчытӧмӧс, сыысь сьӧм (дон) босьтны.

Партия сӧвет уджӧ велӧдан школаяс кольӧны колян вося мында жӧ. Сӧмын кӧсйӧны ещӧ восьтыны рытъя школа. Сійӧ рытъя школаын кутасны велӧдны партийнӧй йӧзӧс да комсомолечьясӧс.

Зэв лӧсьыд лоӧ эськӧ, Обоно кӧ вермас став лӧсьӧдӧм плансӧ ассьыс помӧдз нуны. Ёна ковмас вын да тӧлк чукӧртны Обонолы, медым ставсӧ вермас вӧчны.

Кӧсйысям Обонолы отсӧг!

 

А. Богданов.