КЫДЗИ ВЕЛӦДЧЫНЫ ВОЕННӦЙ УДЖЫН

Ми «Коми Сикт» колян №-ын (№29) гижлім, мый вӧсна колӧ велӧдчыны военнӧй уджӧ быдӧнлы, тані гижам, кыдзи колӧ босьтчыны тайӧ уджас, кыдз велӧдчыны.

Ми тані огӧ кутӧй сёрнитны Гӧрд армия йылысь. Ми веськыда вуджам уджалысь йӧзӧс армияысь бокын, гортаныс военнӧй уджӧ велӧдӧм йылысь. Коді армияын вӧвлывлі нин, вермас шуны: ме пӧ велӧдчылі нин тайӧ уджас, сэсся пӧ тырмас. Тадзи шуны оз позь. Олӧмыд ӧд водзӧ мунӧ. Сідзи жӧ вежсьӧ, водзӧ тувччӧ воюйтан сямыс (техника, тактика и т. д.). Сэсся, мӧдар боксянь кӧ, армияын вӧлӧм йӧзлы колӧ велӧдыштны армияын вӧвтӧм йӧзӧс.

Кыдзи босьтчыны военнӧй удж тӧдмалӧмӧ? Колӧ сиктъясын восьтавны военнӧй уджӧ велӧдчан кружокъяс. Кружокын уджсӧ медбура вермас нуӧдны запасса начсостав либӧ вӧвлӧм красноармееч. Кружокын велӧдчӧны лыйсьыны (стрелковый спорт), мукӧд уджӧ. Кружоклы колӧ судзӧдавны велӧдчан кӧлуй, военнӧй книгаяс, газетъяс, колӧ пырысьтӧм-пыр йитчыны военнӧй научнӧй кружокъяскӧд (эмӧсь быд Уездвоенкоматын да Обласьтувса Терокруг управленньӧ бердын). Сэсся дзик нин быд лыддьысян керкаын колӧ восьтавны военнӧй уголокъяс, ӧшлыны сэтчӧ плакатъяс, судзӧдавны военнӧй книгаяс, газет, журналъяс. Политпросветъяслы колӧ торйӧдны та вылӧ сьӧм.

Медся ёна, дерт, военнӧй удж велӧдӧмӧ колӧ босьтчыны комсомол да коммунист ячейкаяслы, профсоюзъяслы, запасса начсоставлы да вӧвлӧм красноармеечьяслы. Налы колӧ зільны лӧсьӧдавны кружокъяс, уголокъяс военнӧй удж велӧдӧм вылӧ, пырны аслыныс сэтчӧясӧ, ӧзйӧдны тайӧ удж вылӧ став коми уджалысь йӧзсӧ. Дерт, медвойдӧр лоӧ босьтчыны кыскыны кружокъясӧ том войтырӧс, сэсся и верстьӧ йӧзӧс.

Ми чайтам, ставным ӧтув босьтчӧмӧн ми паськыда вермам сувтӧдны уджалысь йӧзӧн военнӧй уджӧ велӧдчӧмсӧ, ӧтув регыдджык нуӧдам тайӧ ыджыд уджсӧ.

Эн пӧ.