КОЛӦ ВЕЛӦДЧЫНЫ ВОЕННӦЙ УДЖӦ

Миян обласьтын эм пӧшти на вӧрзьӧдлытӧм паськыд удж. Кыдзкӧ-мыйкӧ тайӧ уджыс пыр на кӧнкӧ бокын, медбӧрын вӧвлывлі, унджык мортыс омӧля босьтчывліс дай босьтчӧ уджсӧ нуӧдны. Тайӧ уджыс — уджалысь йӧзӧн военнӧй удж тӧдмалӧм. Военнӧй удж тӧдмалӧм колӧ лоны оз кутшӧмкӧ ӧти кадын, а колӧ нуӧдны пыр ӧтарӧ дугдывтӧг, лунысь лунӧ.

Ме таво тӧвнас ветлі Сыктывдінкарса крестьянин керкаӧ шойччысь крестьянакӧд сёрнитны военнӧй удж велӧдӧм йылысь. Сэні ӧти тьӧтушка кыті вугыртыштӧмӧн, кыті и пыр садьӧн кывзіс менсьым сёрнитӧ дай помасьӧм бӧрас юалӧ: «Мый нӧ, тӧварыш, тэ та йылысь висьталан? Регыд ӧмӧй бара война лоӧ? Аттӧ дивӧ, зэв тай бара ыджыд шог тэ висьталін, войбыд оз узьсьы». Ме кыдзи мый верми сылысь сьӧлӧмсӧ ланьтӧді. Мися, узь, эн пов нинӧмысь. Дерт, тайӧ тьӧтушка ногыс повзьыны оз ков военнӧй удж тӧдмалӧм йылысь сёрнитігӧн. Ми огӧ шуӧ, мися, талун либӧ аски, во мысти либӧ кык во мысти война лоӧ. Огӧ жӧ вермӧ шуны, мися, талун либӧ аски, либӧ кымынкӧ во мысти война оз ло. Дерт, СССР-са правительство, рабочӧйяс да крестьяна война оз кӧсйыны. Та йылысь ми ставным тӧдам. Да ӧд ми олам капиталист государствояс пӧвстын. Найӧ миян вылӧ коркӧ уськӧдчыласны на. Найӧ кыйӧдӧны — огӧ-ӧ ми неуна омӧльтчыштӧй дай сэки пызйыштны миянӧс, чышкыштны му вылысь Сӧвет власьт, лӧсьӧдны Россияын бӧр важ права. Сідзкӧ, миянлы пыр колӧ ёнмӧдчыны быд боксянь, тшӧтш военнӧй удж тӧдмалӧм боксянь. Эм шуӧм: «Оз кӧ ков война, лӧсьӧдчы война кежлӧ».