ЗЕЛЕНЕЧ ВӦЛӦСЬТЫН

Аскостса олӧм.

Зеленеч вӧлӧсьтувса олысь войтырлы овны зэв сьӧкыд. Водзӧ вылӧ тайӧ олӧмыс пыр на кутас сьӧктаммыны, оз кӧ став вӧлӧсьтувса войтырыс, государственнӧй да общественнӧй учрежденньӧясыс да организацияясыс та вылӧ бурджыка видзӧдлыны. Ӧні нин йӧзыс олӧны унджыксӧ бокӧвӧй нажӧтка помысь. Та серти йӧзыс юксьӧны: этшаджыкыс — виддза-муа войтыр, кодъяс ёнджыкасӧ олӧны видз-му помысь, этшаджык нажӧткаӧн, а унджыкыслӧн видз-муыс зэв этша. Сэтшӧм йӧзыс унджыксӧ олӧны нажӧтка помысь. Водзӧ паськӧдчыны места некытӧн абу. Гӧгӧр нюр.

Колӧ организуйтны мелиоративнӧй тӧварищество.

Ӧткӧн татшӧм гӧля олӧмсьыс петны крестьянин некыдз оз вермы. Зеленеч да Чукачой сиктъяс весьтын эмӧсь зэв гырысь нюръяс, а нюръяссяньыс усьӧны гырыськодь шоръяс. Мед эськӧ кыпӧдны крестьянинлысь олӧмсӧ, тайӧ сиктъясын колӧ организуйтны мелиоративнӧй тӧварищество да ӧтулӧн босьтчыны нюр косьтан удж бердӧ. Обласьтувса учрежденньӧяслы та вылӧ колӧ бурджыка жӧ видзӧдлыны. Ӧнія видз-му юксигӧн эськӧ вӧлӧсьтувса войтырыд ёна мырсьӧны бурджыка юклӧм вылӧ, да абусьыд, дерт нин, эмыд оз ло.

Волисполкомын.

Волисполкомын уджыс мунӧ шӧркоддьӧма. Зеленеч вӧлӧсьтыс кыссьӧ став сиктъяснас 17 верст саяс на. Сы вӧсна волисполкомлы зэв сьӧкыд нуӧдны ассьыс уджсӧ. Ме ногӧн кӧ, колӧ став вӧлӧсьтсӧ юкны десятаӧн да быд десятаӧ пуктавны председательясӧс (Кӧдзвыв вӧлӧсьтын моз). Та ногӧн, дерт, ёнджыка кокнялас уджыс да позяс бурмӧдны уджалан ногсӧ.

Лӧсьӧдӧны ясли.

Зеленеч сиктӧ лӧсьӧдӧны гожӧм кежлӧ челядьӧс видзны ясли. Яслисӧ восьтӧны шефкомиссияяс сьӧм вылӧ; отсалӧны тшӧтш крестьянаыс. Став челядьыс сійӧ яслиас лоӧ 30 кымын.

Колӧ избач.

Лыддьысян керкаыс эськӧ зэв бур керкаын, да сӧмын избачыс абу. Арсяньыс ӧніӧдз пыр на избачьясыс вежласисны да тӧвбыднас пӧшти некутшӧм удж эз мунлы.

Медбӧръя избачыс вӧлӧма нывбаба да кагаыс вӧсна абу жӧ вермӧма уджсӧ лӧсьӧдны.

Коми Мишӧ.