СКӦТӦС ЛЕЧИТӦЙ ДОКТОРКӦД

Каргӧгӧрса олысьясыд скӧт висьӧмъяс йылысь юасьӧны докторъяслысь да пельшӧръяслысь. Найӧ тӧдӧны бурсӧ скӧт докторлысь да омӧльсӧ кӧнӧвалъяслысь. Войдӧр мортъястӧ лечитлісны пӧлялӧмӧн да ва вылӧ видзӧдӧмӧн, а скӧттӧ малыштӧмӧн да шылаӧн зурӧдӧмӧн, а ӧні унджыкыс нин мунӧны докторъяс ордӧ. Морт висьӧмъяс кодь жӧ висьӧм эм и скӧтлӧн. Висьмӧм скӧтӧс колӧ нулыны доктор дінӧ. Сійӧ тӧдӧ, кыдзи туша пытшкӧсті ветлӧдлӧ вир да кыдзи тысянь воздух сюрӧ вир пытшкӧ, кыдзи сёян пусьӧ рушкуын-сювйын да сідз водзӧ. Кӧнӧвалъясыд лечитігас оз тӧдны, мый вӧчсьӧ висьысь скӧтиналӧн туша пытшкас. Найӧ унджыкысьсӧ тӧдтӧг лечитӧны став пытшкӧс висьӧмсӧ.

Унджык крестьянаыс тӧдӧны вӧвлысь «лёк дой висьӧм». Кӧнӧвалъяс тайӧ висьӧмсӧ тӧдмалӧны нырысь ор петӧм кузя да тшӧка ув пыктӧм кузя. Та серти позьӧ тӧдмавны дас пӧлӧс мӧд-мӧд висьӧм. Став дас пӧлӧс висьӧмыслӧн лечитӧмыс абу ӧткодь. Бара жӧ уна крестьяна тӧдӧны «завӧлӧка кыскӧм», мед бырӧ йӧг да омӧлик пыкӧс. Важӧнджык завӧлӧка кыскывлӧмаӧсь и скӧт докторъяс, ӧні найӧ ньӧтчыд завӧлӧка оз кыскыны. Йӧг да омӧль пыкӧс бара жӧ зэв уна сикас, оз ков найӧс лечитны завӧлӧкаӧн. Быдсикас йӧглы да омӧль пыкӧслы эм аслас лечитан ног. Завӧлӧкаыс пӧльза вайӧ шоча, а омӧльсӧ вӧчӧ пыр.

Ми шуам: скӧтлӧн зэв уна пӧлӧс висьӧм. Унатор эм скӧтлӧн туша пытшкын, уна ногӧн вирыс ветлӧдлӧ скӧт кузя. Висьӧм вермӧ веськавны вомті, нырті, кучик пыр. Став висьӧмсӧ колӧ тӧдмавны, а скӧтыд ӧд висьӧмсӧ ачыс оз висьтав. Тайӧ ставсӧ вермас тӧдны сӧмын скӧт доктор. Тӧдмавны висьӧм позьӧ.

Н. Нахлупин.