СЕЛЬКОРЪЯС ДА КОВТӦМ РӦСКОДЪЯС БЫРӦДӦМ
Ӧні ми быд ногыс зілям бырӧдны быдсяма пӧлӧс ковтӧм рӧскодъяс. Колӧ ёна сюся видзӧдны гӧгӧрбок, мед оз прӧста видзсьы ӧти ур государствоса либӧ обществоса сьӧм. Колӧ кужны вывті ёна сьӧмсӧ видзнысӧ: колӧ видзны ӧти ур, кытчӧ войдӧр видзлім дас ур; оз ков ӧти ур выйӧдз видзнысӧ, позьӧ кӧ видзтӧгыс бергӧдчыны.
Ковтӧм рӧскодъяс бырӧдӧм йылысь лӧсьыда тӧдӧ быд крестьянин ас овмӧс сертиыс: овмӧсыд бурмас сӧмын быд ур кӧ кутасны видзны кӧзяйство вылас. Кытчӧсюрӧ кӧ сьӧмтӧ кутан шыблавны, сэки овмӧсыд оз нин бурмыв. Ӧні быд крестьянин ачыс миян Сӧвет государствоын кӧзяин. Сылы колӧ кыдз-мый вермас зільны ёнмӧдны овмӧссӧ став государствоыслы, видзны сылысь сьӧмсӧ сӧмын коланінӧ. Со мый вӧсна ковтӧм рӧскодъяс бырӧдны тшӧтш колӧ ёна кутчысьны став гӧгӧрвоысь крестьянаыслы.
Сӧвет власьт да коммунист партия ковтӧм рӧскодъяс бырӧдӧм кузя зэв ыджыд удж нуӧдӧны. Газетъяс — Сӧвет власьтлӧн ён отсасьысьяс тайӧ уджас. Миян газетъяс кӧртассьӧмаӧсь селькоръяс пыр зэв уна сиктъясса крестьянакӧд. Сы вӧсна ӧні селькоръяс водзын сулалӧ зэв ыджыд удж ковтӧм рӧскодъяс бырӧдӧм кузя водзсасьӧмын.
Газетӧ гижысьяс — селькоръяс — гижӧны газетӧ став сиктса нелючки йывсьыс. Найӧ индалӧны, коді кыдзи ужалӧ, коді государствоса либӧ обществоса сьӧмсӧ видзӧ ковтӧминӧ, сиктса учрежденньӧясын, организацияясын: кооперативын, волисполкомын, мӧда-мӧдлы отсасян комитетын да мукӧдлаын. Селькоръяс отсалӧны сиктса коммунист ячейкаяслы да йӧзӧс югдӧдан организацияяслы висьтавлыны гӧгӧрвоана крестьяналы бура удж нуӧдӧм йылысь, ковтӧм рӧскодъяс бырӧдӧм йылысь.
Селькоръяс кружокъяслы стенӧ ӧшӧдан газетъясын ковтӧм рӧскодъяс бырӧдӧм йылысь ёна жӧ колӧ гижны. Сӧмын пыр колӧ гижны сиктса олӧм йывсьыс, нелючкияссӧ босьтны сиктса организацияяс, учрежденньӧяс уджсьыс. Сэні колӧ петкӧдлыны, кутшӧма сійӧ нелючки уджъясыс, ковтӧм рӧскодъясыс торкӧны став уджсӧ.
Селькоръяс оз сӧмын гижны омӧльторъяс, нелючки уджъяс йылысь. Сылы колӧ гижны тшӧтш став бур уджсӧ, мый коді вӧчӧма ковтӧм рӧскодъяс бырӧдӧм кузя. Шуам, кооператив бӧръя кадас уджалӧма бура да сылӧн рӧскодыс этшаджык лоӧма, сьӧмыс унджык кольӧма. Селькорлы сы йылысь колӧ нин гижны газетӧ.
Селькоръяслы газет пыр тшӧтш колӧ водзсасьны, мед ковтӧм рӧскодъяс бырӧдӧм уджыс муніс лючкиа, кужӧмӧн. Мукӧддырйиыс учрежденньӧясын уджалысьясыс ковтӧм рӧскодъяс бырӧдігӧн зэв ыджыд ӧшыбкаяс вӧчалӧны: чинтӧны медколан рӧскодсӧ (шуам, школаясысь, йӧзӧс югдӧдан уджысь да мукӧдлаысь) да сы вӧсна кутшӧмсюрӧ сиктса уджсӧ дзикӧдз торклывлӧны. Татшӧмторъяскӧд колӧ водзсасьны.
Селькоръяс да водзӧ мунысь гӧгӧрвоысь крестьяна отсӧгӧн сиктъясын ковтӧм рӧскодъяс бырӧдӧм удж позьӧ сувтӧдны бура. Сӧмын селькоръяслы ёна ковмас матысмыны да тӧдмавны лючки став сиктса олӧмсӧ. Оз позь гижны кыськӧ кывлӧмторъяс, бура тӧдтӧмторъяс. Найӧ мед бура вӧлі гӧгӧрвоӧны гижӧмтор йывсьыс. Сы вӧсна селькоръяс кружокъясын вывті бура колӧ сувтӧдны сиктса став олӧм тӧдмалан удж. Сӧмын сэк селькор вермас отсавны сӧвет власьтлы ковтӧм рӧскодъяс бырӧдны.
