АНГЛИЯСА ИЗ ШОМ ПЕРЙЫСЬ РАБОЧӦЙЯСЛӦН БАСТУЙТӦМ

Коймӧд тӧлысь нин бастуйтӧны англияса из шом перйысь рабочӧйяс. Налы, дерт, зэв сьӧкыд, олӧны тшыг нисьӧ пӧт, сӧмын найӧ чорыда сулалӧны, оз сетчыны капиталистъяслы.

Англияса правительство, дерт, капиталистъяс дор. Капиталистъяс тшӧктӧны рабочӧйясӧс уджавны ӧти час луннас унджык дай донсӧ войдӧр дорысь этшаджык кӧсйӧны сетны. Правительствоыс тшӧктӧ рабочӧйяслы сӧгласитчыны капиталистъяс корӧм вылӧ.

Из шом перйысь рабочӧйяс войнаӧдз дорысь ӧні омӧля нин вӧлі олӧны. Ӧні найӧс со бара тшӧктӧны сизим час пыдди уджавны кӧкъямыс час. Сизим час уджнас нин му пиад уджалігӧн мортыс регыд жугалӧ, висьмӧ, а найӧс ещӧ на дыр кӧсйӧны уджӧдны. Оз ӧд прӧста из шом перйысь рабочӧйясыд сы дыра бастуйтны да тшыгъявны асланыс семьяяснас капиталистъяскӧд водзсасигӧн.

Сӧмын капиталистъясыдлӧн правительствоыд та вылӧ оз видзӧд. Сійӧ лэдзис нин ӧні выль закон, сійӧ законыс из шом перйысь рабочӧйясӧс тшӧктӧ уджавны луннас кӧкъямыс час. Тайӧ законыс из шом перйысь рабочӧйяслысь олӧмсӧ омӧльтчӧдӧ дай та бӧрын сэсся унджык уджтӧм рабочӧй бара лоӧ. Кӧкъямыс частӧ кӧ кутасны уджавны сизим час пыддиыд, дерт, уна рабочӧйӧс лоӧ вӧтлыны.

Сӧмын рабочӧйяс тайӧ законсӧ эз пыдди пуктыны, оз кӧсйыны уджавны сійӧ закон серти. Ӧні ставыс сы сайын, коді вермас — капиталистъяс али рабочӧйяс.