ГӦРД АРМИЯӦ ТОМ ЙӦЗӦС БОСЬТӦМ

Таво арнас, сентябр тӧлысьын, кутасны босьтны Гӧрд армияӧ 1904 воын чужӧм том йӧзӧс. Гӧрд армияӧ босьтӧмсӧ ми кӧсъям нуӧдны коймӧдысь. Воддза кык босьтӧмыс муніс лӧсьыда. 1924 воын мунысьяс пиысь кызвыныс нин ассьыс уджсӧ вӧчисны. Найӧ кад кежлӧ локталісны сборнӧй пунктъяс вылӧ, бура мунісны служитны дай зэв бура служитісны Гӧрд армияын. Кызвынсӧ наысь вежисны колян вося босьтӧм том йӧз. Таво найӧс ковмас вежны, налӧн срокыс тырӧ арнас.

Ӧнісянь нин ми чорыда нуӧдам уджъяс, мед эськӧ таво призыв дырйиыс миян эз мун служитны сэтшӧм йӧз, кодлы ыджыд семья вӧснаыс позьӧ кольччыны гортас овмӧссӧ нуӧдны да вермытӧм чой-воксӧ да бать-мамсӧ вердны, мед эськӧ эз веськавны армияӧ выль местаӧ семьянас овны мунысь йӧз либӧ овмӧс дінас сӧмын на кутчысьысь йӧз. Мед эськӧ рабочӧй да крестьяна армияӧ эз веськавны уджалысьяссӧ нартитысьяс, йӧз уджнас олысь йӧз.

Мукӧдыс вермӧ кольччыны ыджыд семья вӧснаыс, пӧрысь бать-мам вӧснаыс. Сӧмын найӧ оз кӧ сетны кадын заявленньӧ (шыӧдчӧм), вермасны веськавны армияӧ. Татшӧм мортыс аслас мунӧмнас вӧчӧ лишнӧй рӧскод государствоыслы дай гортсьыс овмӧссӧ омӧльтӧдӧ. Тайӧ висьталӧмсӧ колӧ тӧдны быдӧнлы, медъёна том йӧзлы. Быд волисполкомын, лыддьысян керкаын та йылысь тӧдӧны. — Мыйкӧ он гӧгӧрвоӧй, колӧ юавны сэтысь. Кадын кӧ тӧдмасян да кадын сетан заявленньӧсӧ — сэки ставыс лоӧ бур.

Тайӧ уджсӧ кӧ лӧсьыда вермам нуны, лӧсьыда мунас призыв. Лӧсьыда кӧ мунас призывыс — бура жӧ миянӧс кутасны лэдзны и ассьыным овмӧснымӧс лӧсьӧдны: некутшӧм капиталист государствояс оз лысьтны вӧрзьӧдны.

Лӧсьӧдчӧй призыв кежлӧ!