СТРАХУЙТАН КОНТОРАЫН

— Ӧні ас вӧляӧн страхуйтігӧн керъяс да мукӧд кӧлуй сотчӧмысь донсӧ Госстрах босьтӧ выль тариф кузя, важ тариф сертиыс доныс страхуйтігад босьтсьӧ этшаджык 100 прӧчентӧдз. Тайӧ выль тариф серти ӧні ас вӧляӧн страхуйтны ёна кокньыд лоӧ.

— Ӧнӧдз Госстрах кӧдзаяс страхуйтліс сӧмын шерӧн жугӧдӧмысь. Тавосянь кӧсйӧны заводитны кӧзяйство страхуйтны тшӧтш мукӧд омӧль лоӧмъясысь: кынтӧмъясысь, ва ойдӧмъясысь да мукӧдторйысь.

— Сэсся обласьтувса профсоюзъяс Сӧвет корӧм серти татчӧс коми страхуйтан контора центрса правленньӧыслысь корис, медым миян Коми обласьтын кутасны страхуйтны деньгаяс бердын, удж нуӧдысьясӧс да складъясӧн заведуйтысьясӧс, кассиръясӧс, артельщикъясӧс, кладовщикъясӧс да мукӧдӧс сы нога уджалысьясӧс.

— Таво Сыктыв уездын да Кулӧмдін уездын ошъяс ёна скӧтӧс косявлӧмаӧсь. Ӧнӧдз Госстрахлы лоӧма нин мынтыны страхуйтӧм скӧт пыддиыс дас сюрс шайт гӧгӧр крестьяналы.

— Ӧнія колян жар пӧра дырйиыс Сыктыв уездын Ношуль да Читаёв вӧлӧсьтъясысь шерӧн жугӧдӧма кӧдзаяс. Комиссияяс шуӧмаӧсь, жугӧдӧма пӧ 75–90%-ӧдз. Ӧні сэн Госстрахсянь арталӧны, уна-ӧ лоӧма убытка, да кӧсйӧны пыр жӧ крестьяналы ыстыны страхуйтан донсӧ.