ВИДЗ-МУ УДЖАЛАН ЮКӦДЫН

Ӧні видз-му удж нуӧдан Комиссариатсянь миян Емдін уездӧ мӧдӧдӧмаӧсь профессор Беляевӧс, сійӧ мӧдас видлавны нюръяс да тӧдмавны, оз-ӧ позь сэтысь заводитны перйыны трунда.

Сэсся Печӧра вылӧ таво муніс профессор Маляровскӧй да ещӧ квайт велӧдчӧм морт. Найӧ мӧдасны видлавны Печӧрасӧ Усть-Щугӧрсянь да Усть-Усаӧдз, тӧдмавны, оз-ӧ позь сэтчӧ заводитны мӧдӧдавны выль олысьясӧс. Сійӧ жӧ экспедицияыс видлаліс Уллянаса совхоз да шуис, местаыс пӧ бур, позьӧ пӧ вӧчны сэтчӧ сельскокӧзяйственнӧй опытнӧй станция. Ӧні вӧчӧны нин программа.

Таво арсянь думайтӧны Сыктывкарын восьтыны Землемерскӧй курсъяс. Сэні кӧсйӧны велӧдны 30–40 мортӧдз. Велӧдчыны сэні ковмас кык во. Обласьтувса исполкомлӧн пленумыс шуис тайӧ курсъяссӧ восьтыны.