НАДУТКИН, ВЕТЛЫ!

Лӧзымысь (Паджга в., Сыктыв у.) 108 морт пырӧма Всеработземлес союзӧ. Секретарыс волкомас Надуткин ёрт, Паджгаысь, зэв омӧля уджалӧ. Лӧзымӧ сійӧ воліс коркӧ тӧвнас да вӧчліс собранньӧ, а сы бӧрын эз на волы. Шленъяс оз тӧдны, мый налы колӧ вӧчны. Шленскӧй взносъяс уналӧн мынтытӧмӧсь. Ӧні Надуткин ёрт ӧшӧдӧма сельсӧветӧ шленъяслысь список дай гижӧма: коді пӧ шленскӧй взноссӧ оз мынты, оз ло шлен. Шленъяс увгӧны — аслас волытӧм вӧснаыс пӧ да миянӧс чукӧртлытӧг, гашкӧ, сійӧ миянӧс ставнымӧс нин союзысь киритіс да. Шленъяс сельсӧветса юралысь пыр корлісны нин волкомса секретарӧс, да бара на Надуткин эз волы. Оз-ӧ вермы ыстывны кодкӧ Надуткин ёртӧс Лӧзымса Всеработземлесса шленъяс дінӧ?

Кывлысь.