АС СЁРНИА ЙӦЗ КОСТ ОЛАСНОГ ЛӦСЬӦДӦ СӦМЫН СӦВЕТ ВЛАСЬТ

Став му вылын эм зэв уна пӧлӧс сёрниа йӧз. СССР-ын кындзи, быдлаын ас сёрниа йӧзыс торъялӧны кык пельӧ: ӧти пӧлӧсыс ыджыдалӧны, а мӧд пӧлӧсыс уджалӧны, тільсьӧны ыджыдалысьясыс вылас. Ыджыдалысьясысь этшаӧнӧсь, мӧд пӧлӧсыс — унджыкыс. Ыджыдалӧны, дзескӧдӧны мукӧд пӧлӧс ас сёрниа йӧзӧс англичана, французъяс, американечьяс, полякъяс, итальянечьяс да ӧткымын ещӧ ас сёрниа йӧз. Найӧ ыджыдалӧны став мукӧд ас сёрниа йӧз вылас.

Англияса, францияса да мукӧд государствоса капиталистъяс пӧсьсӧ кисьтӧны, уджӧдӧны ас вылас оз сӧмын асланыс государствосьыс рабочӧйяссӧ да крестьянасӧ. Найӧ медъёнасӧ дзескӧдӧны уджалысь йӧзсӧ Индияысь, Китайысь, Египетысь, Мароккоысь да мукӧдлаысь.

Кедзовтана ас сёрниа йӧзлӧн зэв этша праваыс. Став праваяснас босьтӧмаӧсь да пӧльзуйтчӧны ыджыдалысь ас сёрниа йӧзыс. Америкаын оз лэдзны ветлыны ӧти вагонын американечьяскӧд негръяслы. Либӧ индус кӧ (Индияын) мунас англичанин бердті маті, да сылӧн кӧ вуджӧрыс усьӧ англичанин вылас, англичаниныслы сетӧма права нӧйтны индуссӧ. Китайын мукӧд садъяс пыранінас гижӧма:

Понъяслы да китайса йӧзлы пырны оз позь.

Сэтшӧм ас сёрниа йӧзыс кӧ сувтас мездыны ассьыс правасӧ, налы воча ысталӧны войскаяс. Войскаясыс грабиталӧны йӧзсӧ, лыйлӧны, ставсӧ сотӧны. Со ӧні на сідзи вӧлі Мароккоын, Сирияын, Китайын, Египетын.

Европаын сэтшӧм жӧ олӧмыс. Босьтам Польшаӧс. Сэні зэв уна пӧлӧс ас сёрниа йӧз. Полякыс сэні сӧмын джынйыс. Мукӧдыс белорусъяс, украинечьяс, еврейяс, немечьяс. Полякъясыс тайӧ мукӧд пӧлӧс ас сёрниа йӧзсӧ вывті ёна дзескӧдӧны. Налысь мырддялӧны муяссӧ, оз лэдзны велӧдчыныс ас кыв вылас, жандармъяс да пӧличейскӧйяс вӧчӧны накӧд мый окота.

Либӧ босьтам Румынияӧс. Уна миллион молдавана вылын (сэтшӧм ас сёрниа йӧз) Бессарабияын Румынияса власьтъяс нартитчӧны, дзескӧдӧны найӧс. Мукӧдлаын тадзи жӧ.

Сідзкӧ капиталист государствоясын оз вермыны лӧсьӧдны оласногсӧ став ас сёрниа йӧз костас. Сэтӧні быдлаын на ӧти пӧлӧс ас сёрниа йӧз ыджыдалӧны, дзескӧдӧны мукӧд ас сёрниа йӧзӧс.

Позьӧ оз нӧ став ас сёрниа йӧз кост оласногсӧ лӧсьӧдны? Позьӧ. Сійӧс миянлы петкӧдліс нин Сӧвет власьт. Миян эм Сӧвет республикаяслӧн Союз. Быд республикаын ас сёрниа йӧз. Найӧ ставныс ӧти праваӧсь, найӧ ставныс вермӧны уджавны быдлаын, вермӧны веськӧдлыны государствоӧн. Быд обласьтын либӧ республикаын ас сёрниа йӧз лӧсьӧдӧны асьныс оланногсӧ кыдзи аслыныс лӧсьыдджык да мӧда-мӧд ас сёрниа йӧз отсалӧмӧн ӧтвылысь кыпӧдӧны став Союзса овмӧссӧ.

Сідзкӧ сӧмын сӧвет власьт сетӧ права, ӧткодялӧ став ас сёрниа йӧзсӧ.