КЫДЗИ ТАВО КУТАСНЫ МЕЗДЫССЬЫНЫ СЕЛЬХОЗНАЛОГЫСЬ ГӦЛЬ ЙӦЗ

Сельхозналог лӧсьӧдігӧн таво став доходсӧ крестьянинлысь вуджӧдасны сьӧм вылӧ (шайт вылӧ да ур вылӧ). Гӧль крестьянаӧс налогысь мездігӧн волисполкомын кутасны артавны — уна-ӧ крестьяна овмӧсын усьӧ быд едок вылӧ доход. Сы бӧрын сэсся видзӧдласны Обисполкомса шуӧм (постановленньӧ) вылӧ: уна-ӧ доходӧн едок вылӧ мездыссьӧ кӧзяйство тайӧ вӧлӧсьт кузяыс. Шуам, Обисполком постановленньӧ серти мездыссьӧны налогысь, доходыс кӧ едок вылас усьӧ 35 шайт либӧ этшаджык. Гӧль олысь крестьянинлӧн едок вылас доходыс лоӧма 30 шайт. Сійӧс волисполком мездас дзикӧдз налог мынтӧмысь.

Босьтам со тадз, Палаззяса вӧлӧсьтын мездыны шуӧма налогысь кӧзяйствояс, едок вылас кӧ усьӧ доходыс 34 шайт (тайӧ рочӧн шусьӧ «необлагаемый минимум»). Истомин ёртлӧн 4 едок. Став вогӧгӧрся доходсӧ сылы лыддьӧма 120 шайт, ӧти едок вылӧ усьӧ 30 шайт. Налогыс оз босьтсьы, доходыс кӧ этшаджык 34 шайтысь. Сідзкӧ Истомин ёрт налогсьыс мездысяс дзикӧдз.

Доходыс кӧ едок вылас 34 шайтсьыс вылӧджык каяс, сэки налогыс босьтсяс нин став доход кузяыс. Истомин ёртлӧн кӧ едок вылас доходыс лоӧ 36 шайт, налогыс босьтсяс став 36 шайтсьыс.

Этша едока семьяяслы лӧсьӧдӧма торъя ыджда доходсӧ, кытысь налогыс оз босьтсьы кӧзяйство вылӧ. Шуам: Пезмӧг вӧлӧсьтын кӧзяйствоын кык сёйысь. Вогӧгӧрся доходыс налӧн 90 шайт, едок вылӧ усьӧ 45 шайтӧн. Тайӧ кӧзяйствоыс мездыссьӧ дзикӧдз налогысь: Обисполком шуӧм серти тайӧ вӧлӧсьтас этша едока семьяяслысь налогыс оз босьтсьы, кӧзяйствоас кӧ доходыс абу 100 шайтысь уна.

Дерт, татшӧм ичӧт дохода кӧзяйствоясыс вӧлӧсьтад этша сюрас: сӧмын кык да ӧтик едока семьяяс.

Тадзи таво мездыссясны сельхозналогысь гӧль крестьяна. Некутшӧм заявленньӧ ни нинӧм крестьяналы оз ков сетны: исполком ачыс сійӧ аддзас да мездас.

Щ.