КЫДЗИ ТАВО ЛЫДДЬЫССЬӦ СЕЛЬХОЗНАЛОГ

Видз-му да скӧт лыдӧ босьтӧм бӧрын волисполкомын кутасны лыддьыны крестьянинлысь доход муясысь да видзьясысь нормаяс кузя. Бокиса нажӧткаясысь доход лыддяс да пуктас поселённӧй список вӧлӧсьтувса налогӧвӧй комиссия аслас крестьяниннас висьталӧм кузяыс да волисполкомӧн чукӧртӧм справкаяс кузя.

Став доходсӧ тӧдмалӧм бӧрын волисполком кутас лыддьыны быд крестьянинлы налог.

Таво налог лыддьыны мӧймусяысь кокньыдджык: колӧ тӧдны сӧмын став доходсӧ да доход кузя налог лыддян таблича (таблица ставок).

Тайӧ табличаыс со кутшӧм.

Воддза 20 шайт доходысь едок вылӧ .... 2 ур быд шайтысь.

20 шайтсянь 30 шайтӧдз доходысь (10 шайтсьыс) едок вылӧ .... 3 ур быд шайтысь.

30 шайтсянь 40 шайтӧдз (10 шайтсьыс) доходысь едок вылӧ .... 5 ур быд шайтысь.

40 шайтсянь 50 шайтӧдз (10 шайтсьыс) доходысь едок вылӧ .... 10 ур быд шайтысь

50 шайтсянь 60 шайтӧдз (10 шайтсьыс) доходысь едок вылӧ .... 17 ур быд шайтысь.

60 шайтсянь 80 шайтӧдз (10 шайтсьыс) едок вылӧ .... 21 ур быд шайтысь.

80 шайтсянь 100 шайтӧдз (10 шайтсьыс) едок вылӧ .... 23 ур быд шайтысь.

100 шайтысь вылӧджык едок вылӧ .... 25 ур быд шайтысь.

Тайӧ таблича кузяыс быд крестьянин вермас ас кӧзяйствосьыс лыддьыны налогсӧ.

Босьтам, шуам, овмӧс Паджгаса крестьянинлысь да лыддям сылы налогсӧ мӧд во кежлӧ. Паджгаса крестьянинлӧн Мелехинлӧн 2 десятина му, 3½ десятина видз, сы пытшкын 1 дес. ойдлана видз да 2½ дес. ойдлытӧм, сэсся сылӧн 1 вӧв да 2 мӧс.

Обисполком шуӧм (постановленньӧ) серти доходнӧй нормаыс Паджгаса вӧлӧсьт кузяыс со кутшӧм: десятина пашняысь 50 шайт, десятина ойдлана виддзысь — 25 шайт, десятина ойдлытӧм виддзысь — 13 шайт, ӧти мӧскысь — 19 шайт, ӧти вӧлысь — 23 шайт. Арталам доход видз-муысь да скӧтысь:

2 десят. му, 50 шайтӧн десятинаысь — 100 шайт.

1 десят. ойдлана виддзысь, 25 шайтӧн десят. — 25 шайт.

2½ десят. ойдлытӧм виддзысь, 13 шайтӧн десят. — 32 ш. 50 ур.

1 волысь — 23 шайт.

2 мӧскысь, 19 шайтӧн мӧскысь — 38 шайт.

____

Став доходыс — 218 ш. 50 ур.

Таысь кындзи, вӧлӧсьтувса налогӧвӧй комиссия пуктӧма бокиса нажӧткаысь вогӧгӧрся доход (шуам кӧть, сортовка лэдзӧмыс) 50 шайт. Став доходыс Мелехиныдлӧн лоӧ 268 шайт 50 ур.

Мелехинлӧн 5 сёйысь (едок). Доходыс ӧти едок вылас усьӧ 53 шайт 70 ур.

Ӧні лыддям налогсӧ.

Воддза 20 шайтсьыс босьтсьӧ 2 урӧн быд шайтысь, ставыс босьтсяс .... 40 ур.

20 шайтсянь 30 шайтӧдз босьтсьӧ 3 урӧн быд шайтысь, ставыс тайӧ доход пайсьыс босьтсяс .... 30 ур.

30 шайтсянь 40 шайтӧдз босьтсьӧ 5 урӧн быд шайтысь, ставыс босьтсяс .... 50 ур.

40 шайтсянь 50 шайтӧдз босьтсьӧ 10 урӧн быд шайтысь, ставыс .... 1 шайт

50 шайтсянь 60 шайтӧдз босьтсьӧ 17 урӧн быд шайтысь; миян 50 шайт бӧрас коли сӧмын 3 шайт да 70 ур; сідзкӧ таысь босьтсяс налогыс .... 63 ур.

____

Став налогыс ӧти едок вылас лоӧ .... 2 шайт 83 ур.

Мелехинлӧн вит едок, став едок вылас налогыс лоӧ — 14 шайт 15 ур.

Тадзи лыддьысяс таво видз-му налог быд крестьянскӧй овмӧсысь.

Щ.