КУЛИГАНИТӦМЫСЬ МЫЖДӦНЫ ЁНДЖЫКА

Сиктъясын ӧні вывті ёна паськалі кулиганитӧм. Быд лун ми газетын печатайтам сиктъясын юӧм йылысь, косьяс йылысь, быд ногыс кулиганитӧм йылысь. Рабочӧйяслӧн да крестьяналӧн власьт ёна видзӧдӧ сиктъяс вылӧ, чорыда косясьӧ кулиганитӧмкӧд, мездӧ крестьянаӧс сэтшӧм лёк йӧзсьыс. Ӧнӧдз законъяс серти чорыда мыждывлісны кулиганитӧмысь. Таво юнь сизимӧд лунын йӧзӧдісны выль закон. Сійӧ законыс серти кулиганитӧмысь ещӧ на чорыда мыждӧны.

Кодкӧ кӧ первойысь на сюрӧ кулиганитӧмысь, сійӧс мыждӧны волисполкомъяс. Волисполкомъясыс вермасны сійӧс штрапуйтны ветымын шайтӧдз либӧ вермасны мырдӧн уджӧдны кутшӧмкӧ уджъяс вылын.

Волисполкомыс кӧ нинӧм оз вӧч, кулиганитысьсӧ сетӧны судӧ. Судыс сійӧс вермас судитны пукавны куим тӧлысьӧдз.

Мортыс кӧ вывті ёна кулиганитӧма — жугӧдлӧма, нӧйтӧма кодӧскӧ, либӧ сійӧ кӧ унаысь нин сюрлӧма кулиганитӧмсьыс, либӧ абу дугдӧма кулиганитӧмсьыс милиционерӧн ли волисполкомса уджалысьясӧн унаысь кулиганитӧмсьыс дугдыны тшӧктӧм бӧрын, — сэтшӧм мортсӧ суд вермас судитны пукавны кык воӧдз.