УДЖ БУРМӦ

Межадорын (Сыктыв у.) эм удждысян тӧварищество. Сэтчӧ пырӧны шленъяс куим вӧлӧсьтысь — Межадорысь, Волсяысь дай Чуклӧмысь. Юнь 20-ӧд лун кежлӧ тӧвариществоын вӧлі 419 морт. Вступнӧй взнос шленъяслӧн 25 ур, пай — 3 шайт. Удждысян тӧвариществолӧн эм лавка. Сэні вузассьӧ видз-му уджалан да мукӧд сикас кӧрта кӧлуй. Колян во лавка вӧлі вайлӧма убытка. Ӧні октябр тӧлыссянь тӧвариществолы воӧма 1,281 шайт доход, октябр тӧлыссянь лавкаӧ волӧма 9,388 шайт 50 ур дон тӧвар, вузалӧма 7,110 ш. 3 ур дон. Таво тулыс крестьяналы вузалӧм 3 вартан машина да 95 плуг.

Конан Ӧльӧксан.