КОМИ ГИЖЫСЬЯСЛӦН ГОЖСЯ УДЖ
КАПП-лӧн чукӧрторъяс сиктъясын миян абуӧсь на — эгӧ на вевъялӧ лӧсьӧдавны. Да кӧть сэтшӧм чукӧрторъясыс и вӧліны, гожӧмнад чукӧрӧн уджтӧ сьӧкыд нуӧдныд (коді шойччӧ, коді кытчӧкӧ мунӧма, коді страдуйтӧ и с. в.)
Та вӧсна гожӧмын гижысьяслы медбур ӧткӧн-ӧткӧн ёнджыка лыддьысьыштны да лӧсьӧдчыштны тӧвся удж кежлӧ.
Ӧти-кӧ, колӧ тӧдмавны бурджыка, колӧ гӧгӧрвоны: мыйла колӧ йӧзлы литература, кутшӧм колӧ ӧні миянлы литература, кыдзиджык колӧ видзӧдны ӧнія гижысьяслы олӧм вылас, олӧм вежсьӧм вылас, колӧ велӧдчыны торйӧдлыны бур, колан гижӧмторъяс омӧль ковтӧм гижӧмторъясысь, колӧ век тӧдны донсӧ, коланлунсӧ, бурлунсӧ и омӧльлунсӧ аслад гижӧмторъяслысь.
Сэсся, ми огӧ на бура кужӧй гижныс, бур гижанногъяссӧ огӧ на тӧдӧй, гижӧдыслӧн вылысыс омӧль на миян артмӧ, мичлуныс абу — колӧ бура тӧдмавны, кутшӧм гижӧм ногъяс эмӧсь, кыдзи мукӧд гижӧны мичаа, шыльыда, колӧ видлавны гӧгӧрбок мича гижӧдторъяс рочьяслысь, велӧдчыны бур роч гижысьяслысь бура гижны.
Тайӧ став йывсьыс позьӧ тӧдмавны нигаясысь.^Кутшӧм нигаяс лыддьыны, мый йылысь да кыдзи тӧдмавны — карса коми гижысьяслысь колӧ юасьны КАПП правленньӧысь; сиктса гижысьяслы правленньӧ ыстас индӧдъяс./^
Мӧд-кӧ, быд гижысьлы колӧ лӧсьӧдчыны тӧвся гижан удж вылӧ, колӧ ёнджыка видзӧдлыны олӧм вылас, мый керсьӧ ас гӧгӧрыд, колӧ юрад босьтавны тӧдчанджык лоӧмторъяс (мый йылысь эськӧ тӧвнас сэсся позяс гижны ыджыд гижӧдторъяс), колӧ бура кывзыны коми сёрни да бурджык, мичаджык сёрникузяяс, торъя кывъяс, йӧз кост сьыланкывъяс и пасйыштавны аслыд кытчӧкӧ;^Ставсӧ тайӧ пасъявныд быд гижысьлы колӧ лӧсьӧдны ичӧтик, зептын вӧдитан, тетрадьтор./^ колӧ тӧдны ӧнія олӧм-вылӧм йӧзыслысь, налысь быдлунъя оласногсӧ, кыдзи олӧны, мыйӧн олӧны, налысь кӧсйӧмъяссӧ. Коді омӧля тӧдӧ олӧмтӧ — сійӧ оз тӧд мый йылысь гижны, кыдзи гижны, сылӧн оз артмы колан да бур гижӧд.
Гижысьлы тайӧ, дерт, некор оз ков вунӧдлыны, но ми ёнджыка ыстысям гожӧм вылӧ — гожӧмнад ӧд быдторджык аддзан, унджык тыдалӧ, уналаӧджык волан, ачыд эштанджык и.
Тадзикӧн колӧ быд гижысьлы аслыс неуна лӧсьӧдчыштны тӧв кежлӧ, дыр пукалӧмӧн гижӧм удж кежлӧ.
