КАПИТАЛИСТЪЯС МЕЗДІСНЫ САРӦС ДА КНЯЗЬЯСӦС
Германияын ёна нин дыр муніс вензьӧм германияса уджалысь да капиталистъясыс кост важ князьясыслы да сарыслы став эмбурсӧ бӧр сетӧм йылысь. Германиясьыс сарсӧ да князьяссӧ шыбитӧм бӧрын налы Германиясьыс лои мунны. Капиталистъяс став эмбурсӧ, кодӧн пӧльзуйтчылісны сарыс да князьясыс, кӧсйӧны ставсӧ бӧр налы сетны.
Германияса уджалысь йӧз бӧр эмбурсӧ оз кӧсйыны сетны. Сійӧ став эмбурыс вӧлі уджалысь йӧзлӧн да уджалысьяс тшӧктӧны правительстволы сійӧ эмбур вылас лӧсьӧдны бурторъяс став уджалысь йӧзлы. Капиталистъясыд, дерт, зільӧны князьясыдлы да сарлы сетны эмбурсӧ, мед мӧдысь уджалысь йӧзыс нинӧм сеттӧг сідзжӧ налысь эз мырддявны эмбурсӧ.
Германияса коммунистъяс чуйдӧдӧмӧн неважӧн став Германия пасьталаыс кырымӧдалісны ставсӧ, коді оз кӧсйы сетны важ князьяслы да сарлы нинӧм, став эмбурсӧ налысь шуӧ босьтны дон мынтытӧг. Гижӧдыд чукӧрмис зэв уна. Правительстволы закон сертиыс лои лӧсьӧдны став Германия пасьтаыс сарыдлысь да князьясыдлысь эмбур босьтӧм йылысь гӧлӧсуйтӧм. Гӧлӧсуйтӧмыс лоӧ вына германияса законъяс серти, гӧлӧсуйтӧны кӧ став гырысь йӧз пытшсьыс джынйыс либӧ джынсьыс уна. Сідзкӧ колӧ вӧлі Германияын гӧлӧсуйтны кызь миллион мортлы. Этшаджыкӧн кӧ кутасны гӧлӧсуйтны, гӧлӧсуйтӧмыслӧн выныс оз ло.
Став озыр йӧз дор сулалысь партияяс первойсяньыс кутісны зільны торкны тайӧ гӧлӧсуйтӧмсӧ. Найӧ став асланыс шленъясыслы тшӧктісны, мед найӧ эз гӧлӧсуйтны сарлысь да князьяслысь эмбур вӧсна. Сідзсӧ найӧ вӧчисны, мед кызь миллион гӧлӧсыс оз чукӧрмы да мед гӧлӧсуйтӧмыслӧн выныс оз ло.
Ӧні муніс Германияын гӧлӧсуйтӧм сарлысь да князьяслысь эмбур дон мынтытӧг босьтӧм йылысь. Капиталистъяс вермисны падмӧдны германияса йӧзсӧ. Кӧні газетъяс пыр, кӧні повзьӧдлӧмӧн найӧ уна йӧзӧс дугӧдісны гӧлӧсуйтӧмысь. Гӧлӧсуйтісны сӧмын дас вит миллион да джын морт. На пиысь 14 миллион саяс гӧлӧсуйтіс сарлысь да князьяслысь эмбур босьтӧм вӧсна. Сӧмын кызь миллион гӧлӧсыд эз чукӧрмы да гӧлӧсуйтӧмыс оз вермы вынсявны.
Капиталистъяс Германияын ӧні вермисны. Сӧмын вензьӧмыс рабочӧйяс кост оз кус. Тайӧ ещӧ ёнджыка на сувтӧдӧ кось вылӧ рабочӧйясӧс.
