КОЛӦ ПЫРНЫ КРЕСТЬЯНКАЛЫ КООПЕРАТИВӦ
Быд во кутісны миян празднуйтны ставмувывса кооперация лун.
Тайӧ луннас миян крестьянкаяслы колӧ видзӧдлыны асланыс кооперативъяс вылӧ, сійӧ удж вылӧ да чорыда думыштны, мый сійӧ вермас сетны сылы бура уджалӧмӧн.
Видзӧдлам кӧ сыкӧд орччӧн купечьяслысь тӧргуйтӧмсӧ — ыджыд кост лоӧ. Кооператив лӧсьӧдӧ бурджык тӧвар, вузалӧ донтӧгджык. Сельскокӧзяйственнӧй кооператив отсалӧ вузавны крестьяналы ассьыныс лишалан сёян-юанъяссӧ да лӧсьӧдны выль пӧлӧс пиняяс, плугъяс да мукӧд пӧлӧс бур видз-му уджалан кӧлуй. Удждысян тӧвариществояс сетӧны водзӧсӧн сьӧм кӧзяйство ёнмӧдны, видз-му удж кокньӧдны.
Миян крестьянкаяс омӧля на гӧгӧрвоӧмаӧсь кооперацияыслысь ыджыд удж нуӧдӧмсӧ, сылысь пӧльзасӧ. Миян обласьт пасьта став нывбаба пытшсьыс пырӧмаӧсь сӧмын на 3.000 морт (14%), а правленньӧясас да ревизионнӧй комиссияясас сӧмын на 5 морт. Крестьянкаыд миян ылын на сулалӧ, абу на матыстчӧма кооперативъяс бердас.
Мый нӧ кооперацияыс сетӧ нывбабалы?
Вайӧ налы тӧвар кутшӧм колӧ, оз асланьыс личкы веситігас да мерайтігас купечьяс моз. Вайӧ налы дай челядьлы торъя коланторъяс быдтысигӧн: нёньяс, вата-бинт да мукӧдторъяс. Торъя кокньӧдӧ пырны кооперацияас гӧльджык нывбабаяслы: декабр тӧлысьын 1924 воын тӧлысь чӧж кооперативӧ пырысь нывбабаяслысь босьтісны миян обласьт пасьта сӧмын пай джынсӧ мужикъяс серти. Март 8-ӧд лунӧ тайӧ воӧ сідзжӧ кокньӧдъяс вӧліны пырны кооперативъясӧ нывбабаяслы уна вӧлӧсьтын.
А коді первой отсӧг сетӧ ясли восьтігӧн? Дерт, кооперативъяс! Сёськаса (Сыс. у.) потребительскӧй кооператив эськӧ абу на ёна вына, мӧд во нин отсалӧ. Ыбса кооператив сідзжӧ, дай мукӧдыс ёна отсалӧны. СССР пасьтаыс асланыс сьӧм вылӧ видзӧны кооперативъяс 146 ясли, 174 площадка, 48 консультация (кагалы да мамлы дзоньвидза асьнысӧ кутны сӧвет сетанін).
Водзӧ кежлӧ миян Обсоюз кӧсйӧ тшӧктыны торйӧдны торъя сьӧм (фонд) гӧль нывбабаяслы кооперативӧ пырны отсалӧм-кокньӧдӧм кузя. Быд ног мырсьӧны кооперативъяс унджык нывбабасӧ кыскыны.
Тайӧ вонас Обсоюз тшӧктіс вӧлӧсьтъясас кооперативъясыслы бӧрйыны лавочнӧй комиссияяс. Найӧлы колӧ отсавны правленньӧыслы да ревизионнӧй комиссияыслы быд ног бурмӧдны налысь уджсӧ. Тайӧ комиссияясас нывбабаяс вермӧны ёнджыка тӧдмасьны тӧвар сортъяснас, рӧскодъяснас да удж нуӧдӧмнас. Уна бур позьӧ ӧтсӧгласӧн уджалӧмӧн вӧчны.
Но ми уна на кылам шуасьӧм, сёрни бабаяссянь да мужикъяссянь: омӧля пӧ удж нуӧдӧ миян кооператив, — а асьныс чуньнас оз вӧрзьӧдны кооперативсӧ ёнмӧдӧм вӧснаыс.
Ставмувывса кооперация праздник лунас, кор быд кооператив пондас видлавны ассьыс вынсӧ, колӧ быд нывбабалы матыстчыны сы бердӧ, видзӧдлывны, кывзыштны, пырны сэтчӧ да ӧтвыв кооперативсӧ ёнмӧдӧмӧн бурмӧдны ассьыныс олӧмсӧ. Кымын уна пырас нывбаба кооперацияӧ, сымын регыд, сымын ӧдйӧ артмас выль кокньыд олӧм, сымын регыд крестьянка мездысяс важ сьӧкыд омӧль олӧмысь.
Матыстчӧй, коми аньяс, матӧджык кооперация бердӧ! Пырӧ ставныд сэтчӧ, лӧсьӧдӧй, кокньӧдӧй асланыд вынӧн бур ӧлӧм!
Н. Анис.
