КЫПӦДӦЙ КООПЕРАЦИЯ!

Видз-му уджалан, кустара прӧмышляйтан да сьӧм удждан кооперативъяслӧн колян во сентябр тӧлысьӧдз эз вӧв асланыс Союз (ӧтувтчӧм). Тайӧ кооперативъясыс уджалісны коді кыдзи кужис, велӧдысь некод эз вӧв. Уджныс налӧн мукӧддырйиыс муніс эз веськыд туйӧд. Мукӧд кооперативсӧ лӧсьӧдӧма ӧтув машинаяс ньӧбны, ӧтув видз-му уджавны да мукӧд ногӧн овмӧс бурмӧдны, а найӧ сы пыдди вӧлі заводитӧны вузасьны уна пӧлӧс тӧварӧн. — Ассьыныс веськыд уджсӧ дзикӧдз вунӧдавлісны. Мукӧд ӧтувтчӧмъяс ӧтлаасьлісны, мед эськӧ вермасны уджӧн машинаяс ньӧбны. Ньӧбӧм бӧрас ӧтувтчӧмлӧн весиг местаыс оз коль — бырӧ-разалӧ, некутшӧм удж оз мун. Мукӧддырйиыс ӧтувтчӧны кооператив ним улӧ озыр-крепыд крестьянинъяс, ас рӧдвуж чукӧрыс, ньӧбалӧны машинаяс да мукӧдтор. Уджалӧны ас кежас, гӧль да шӧркоддьӧм крестьянаӧс оз ас дінас сибӧдны. Уджсӧ нуӧдӧны найӧ оз кооператив ногӧн: мый вермӧны ӧтдортӧны гӧль йӧзсӧ, зільӧны найӧс дзескӧдны да ас улас босьтны. Уна на мукӧд пӧлӧс омӧльторъяс эмӧсь тайӧ кооперативъяс пытшкад. Сӧмын эмӧсь бура, лючкиа уджалысь, гӧль крестьяналысь овмӧс кыпӧдысь кооперативъяс.

Тайӧ кооперативъяслӧн Союз воссьӧм бӧрын уна ӧтувтчӧмъяслӧн уджыс кутіс бурмыны. Кутшӧмкӧ ӧтувтчӧмъяс кӧ оз нуӧдны ассьыныс уджсӧ, Союзсянь некутшӧм отсӧг оз сетсьы дай водзӧ оз кут сетсьыны. Сэсся некутшӧм отсӧг оз вермы лоны ас кежас уджалысь ӧтувтчӧмъяслы, оз кӧ пырны найӧ Союзӧ шленӧн.

Быд кооперативлы, быд шленлы тайӧ лунӧ колӧ думыштны, гӧгӧр видзӧдлыны, кыт-мый найӧ кооперативын омӧль, кыдз уджалӧны налӧн юралысьяс. Оз ков надейтчыны кодкӧ вылӧ. Быд шленлы колӧ сэні уджавны, омӧльторъяссӧ индыны, висьтавны. Оз ков вунӧдны — «кооперациятӧг социализмтӧ му вылад вӧчны он вермы».

Социализмӧдз воштысьны огӧ вермӧ, кутам кӧ уджавны миян пӧльяс моз. Миянлы колӧ босьтчыны машинаяс бердӧ. Сійӧ кокньӧдӧ, бурмӧдӧ удж. Колӧ машинаяссӧ ньӧбны ӧтувтчыны кооперативӧ. Ӧтка крестьяналы зэв сьӧкыд ньӧбны дона машинаястӧ.

Унаторйысь (йӧлысь, шабді кӧйдысысь, картупельысь да мукӧдторйысь) крестьяна оз вермыны босьтны машинаястӧг.

Тайӧ лунӧ колӧ уджсӧ паськӧдны, бурмӧдны, кыскыны ас дорад выль шленъясӧс!

Лодыгин.