КИТАЙСА ГЕНЕРАЛЪЯС НИНӦМ ВӦЧНЫ ОЗ ВЕРМЫНЫ

Революциялы паныд мунысь китайса генералъяс таво тулыс босьтісны народнӧй армиялысь войвыв Китайсӧ дай Китайлысь столичасӧ — Пекин. Сӧмын найӧ эз вермыны лоны кӧзяинъясӧн Китаяс, ёна эськӧ зілисны сы вӧсна Англия да Япония да.

Наӧдз став Китай вылас вӧлі правительство. Сійӧ правительствоыс кӧть омӧлика, да пыр кыдзкӧ нуис уджсӧ. Ӧні Китайын весиг правительствоыс абу. Став тӧдчана важ правительствоас уджалысьыс оз пырны министръясас. Правительствоыслысь дзик нин некод оз кывзы, налогъяс сійӧ чукӧртны оз вермы, а служащӧйяс жалӧванньӧ мынтытӧдзыд уджавныс оз вермыны. Быд губерняын ыджыдалӧны генералъяс, кыдзи налы колӧ. Чжан Цзолиньӧн (медыджыд революциялы паныд мунысь генералыс) сьӧмыс оз тырмы некыдзи. Бумага сьӧмыслӧн доныс пыр усьӧ. Войскаыс сылӧн грабитӧны крестьянаӧс, жалӧванньӧсӧ налы оз сетны да.

Крестьяналы овнысӧ зэв сьӧкыд. Ӧні крестьяна уналаын нин воча сувтӧны генералъяслы да кутчысьӧны косясьны найӧяс салдатъяскӧд.