ГОЖСЯ УДЖ КОМСОМОЛ ЯЧЕЙКАЛӦН СИКТЪЯСЫН

Локтіс му-видз уджалан кад. Колян гожӧмнас мукӧд комсомол ячейкаяслӧн уджыс сувтліс, комсомолечьяс мӧда-мӧдыскӧд торъявлісны, эз аддзысьлыны. Собранньӧяс эз чукӧртлыны. Ячейка эз вермыв нуӧдны некутшӧм прамӧй удж. Мед таво оз ло сэтшӧмторйыс, колӧ быд комсомол ячейкалы ёна думыштны удж йывсьыс. Медвойдӧр ячейкалы колӧ думыштны йӧзлы колан удж (общественно-полезные работы) нуӧдӧм йылысь. Тӧдмасьны да отсавны сӧветлы, кооперативлы, мӧда-мӧдлы отсасян комитетлы, нуӧдны уджсӧ общественнӧй организацияясын. Гожӧмын крестьяналӧн ёнджыка думъясыс бергалӧны му-видз гӧгӧр: видз-му юклӧм йылысь, налогъяс йылысь да мукӧдтор. Комсомол ячейкалы колӧ висьтавлыны крестьяналы та йылысь. Видзӧдны, мед кооператив кадӧн ваяс крестьяналы кӧсаяс, чарлаяс да мукӧд му-видз уджалан кӧлуй. Мӧда-мӧдлы отсасян комитетӧс кадын тшӧктыны отсавны страда дырйи гӧль крестьяналы. Оз ков вунӧдны сельскокӧзяйственнӧй кружок. Медыджыд уджыс тайӧ кружокыслӧн вермас лоны сӧмын гожӧмын.

Уджсӧ том йӧз пиын оз жӧ ков лэдзны кусны. Колӧ зільны быд ногӧн кыскыны том йӧзсӧ лыддьысян керкаясӧ, комсомол ячейка дінӧ. Бура колӧ лӧсьӧдны уджсӧ спорт кружокъяслысь.

Гожӧмын содӧны батракъяс. Колӧ зільны пыртны найӧс комсомолӧ. Комсомол собранньӧяс вӧчлывлыны лоӧ тӧвся серти шочджыка, сӧмын колӧ чукӧртчывны кадын. Медбур чукӧртчывны кыкысь тӧлысьын. Собранньӧяс позьӧ вӧчны ывлаын. Собранньӧяс вылын колӧ сёрнитны сэтшӧмторъяс йылысь, кодъясӧс ёнджыка радейтӧны том йӧз.

Газет быд ногӧн ёна отсалӧ комсомолечьяслы удж нуӧдігас. Политкружокъяс, школаяс гожӧмын оз уджавны, сы понда быд комсомолечлы колӧ лыддьыны газет. Прӧст, праздник кадъясын крестьяна чукӧртчывлӧны керка бокъясас тӧлкуйтыштны ӧттор-мӧдтор йылысь. Сэтшӧминъясас комсомолечлы колӧ гора лыддьыны газетъястӧ. Кутан кӧ лыддьыны крестьяналы коланторъяс, шуам, видз-му уджалӧм йылысь, налог йылысь да мукӧдтор, крестьянаыд зэв бура кывзасны. Оз ков эновтны удж пионеръяс пӧвстын. Тайӧ ставсӧ комсомол ячейкаяс вермасны вӧчны сэки, кор ставыс босьтчасны удж дінас. Уджсӧ колӧ сетны ставыслы.

Морозов.