МӦСКУАЫН КОМИ НИГА ЛЭДЗӦМ

СССР-са йӧзъяслӧн шӧрса нига лэдзанінын (Центральное Издательство народов СССР) 1924 восянь эм коми секция. Сэні уджалӧ ӧти морт. Гижысьяссӧ коми секция корсьӧ ёнджык Мӧскуаын велӧдчысь коми студентъяс пӧвстысь (гижӧны и коми обласьтын олысьяс).

Мӧскуаын ӧнӧдз лои лэдзӧма:

1924 воын 3 нига, 16⅜ печ. лист, 21.000 экз.

1925 „ 15 „ 71⅛ „ 73.000 „

1926 (5 тӧлысьӧн) 8 „ 20¼ „ 30.000 „

_____

Ставыс 26 нига, 107¾ печ. лист, 124.000 экз.

На пытшкысь лэдзӧма коммуса комияс (пермякъяс) сёрниӧн 1 нига 39¼ печ. лист, 27.000 экземпляр. Мукӧдсӧ лэдзӧма коми обласьтувса сёрниӧн.

26 нига пытшкысь 14-ыс — школаын велӧдчан нигаяс, 7 — Ленин велӧдан йылысь, 3 — крестьяналы гижӧм нигаяс, 2 — пионеръяслы. Та серти тыдалӧ — Мӧскуаын унджык нигаыс лэдзсьӧ школаын велӧдчан нигаяс.

Нигаяссӧ Мӧскуаад бурджыка позьӧ лэдзны (типографияыс бурджык), сӧмын печатайтӧмыс донӧнджык сувтӧ. Колӧ босьтчыны донтӧммӧдны.

Войдӧр волі нигаясас уна колявлӧ торксялӧминъяс. Бӧръявыв сійӧ пондіс чинны, торксялӧм этшаджык сюравлӧ (дерт, эм жӧ на).

Шӧрса нига лэдзанінлӧн эм нига набирайтысьясӧс да печатайтысьясӧс велӧданін. Сэні велӧдчӧны 3 коми морт. Наысь кындзи нига печатайтанінас (типографияас) уджалӧны 3 коми морт.

Коми обласьтувса сёрниӧн лэдзӧм нигаяссӧ ставсӧ ньӧбӧ Сыктывкарса коми нига лэдзанін. Коммуса сёрниӧн лэдзӧм нигаяссӧ ньӧбалӧ да разӧдӧ коми школаясӧ Наркомпросбердса коми отдел. Сыысь кындзи, коммуса сёрниа коми нигаяссӧ некод на эз ньӧблы: Уралын эськӧ комиыс 150.000 морт гӧгӧр, Ятка губерня улын 12.000 кымын да Сибырын 10.000 кымын. Ковмас найӧс босьтчӧдны коми нигаяссӧ ньӧбавны.

Сандрик Микол.