ВӦР СОТЧӦМ ЙЫЛЫСЬ
Ӧти гожӧм на эз кольлы миян вӧр сотчывтӧг. Быд во кӧнкӧ да кӧнкӧ сотчӧ.
Таво тулыс вӧлі кос, гожӧм сӧмын на локтӧ, а вӧръяс поводнӧя нин сотчисны. Вӧр сотчӧмӧн миян медколанторйыс вошӧ, озырлунным чинӧ, асьнымӧс дай государствонымӧс гӧльмӧдам. Позьӧ нин эськӧ гӧгӧрвоны миян коми йӧзлы: вӧр помын миян став озырлунным. Няньясыд оз судзсьыны, колӧ кыськӧ нажӧтка босьтны. Кытысь сійӧс босьтан? Ставсӧ вӧрысь! Кыйсян-вӧралан, сортовка лэдзан, стрӧитчан — ставыс миян вӧр помын. Уна нин та йылысь вӧлі висьтавлӧма да гижлӧма эськӧ да, огӧ на, тыдалӧ, гӧгӧрвоӧ, ас понда уна на добра бырӧдам.
Кыдзи кутас вӧр сотчыны, пырысь-пыр колӧ ӧтвылысь став обществоӧн мунны водзджык, ньӧти нюжӧдтӧг. Оз ков виччысьны тшӧктӧм вылісянь, сэки сёр нин лоӧ биӧн вермасьны.
Та йылысь эм шуӧм Обласьтувса Обисполкомлӧн («Югыд туй» № 93), сэтчӧ гижӧма, кыдзи колӧ удж нуӧдны местаяс вылын, вӧръяс сотчигӧн. Тайӧ шуӧм серти быд сельсӧвет да волисполком вермасны чукӧртны кусӧдчыны мужикъясӧс 45 арӧсӧдз да нывбабаясӧс 40 арӧсӧдз, сотчӧ кӧ вӧрыс горт гӧгӧр дас вит верстӧдз.
Кӧні лючки-ладнӧ биӧн олӧны да кӧні вӧръяс оз сотчыны, либӧ пырысь-пыр сотчысь вӧрсӧ кусӧдӧны, тайӧ шуӧм серті жӧ крестьяналы сетсьӧ кокньӧдъяс вӧр ньӧбигӧн. Обществояслы, кӧні тшӧкыда вӧрыс сотчывлӧ да мыжа йӧзыс оз сюрны, кутасны таво арсянь сетны сӧмын сотчӧм вӧр, бур вӧр донӧн жӧ. Сідзсӧ кутасны сетавны кытчӧдз оз бырӧдны став вӧрсӧ сотчӧм местаысь.
Кӧнсюрӧ тайӧ шуӧм бура тӧдӧны дай вӧчӧны сы серти. Неважӧн ӧні сотчыны кутліс вӧр Ношуль дачаын. Крестьянаыс абу виччысьӧмаӧсь тшӧктӧм вылісянь, а пырысь-пыр кусӧдӧмаӧсь. Сідзжӧ таво вӧлі вӧр пӧжар Паль вӧлӧсьт улын; сэні кусӧдчыны водзвыв абу петӧмаӧсь да, биыс паськалӧма Ява яг вылӧ. Сотчӧма медся бур вӧр сюрс десятинаысь унджык. Уроныс лоӧма — артыштны он вермы мый дон. Сыктывкар дінын неважӧн сотчис Гаръя туй бок. Ёна эськӧ йӧзсӧ ыстісны кусӧдчыны, да сӧмын вит морт ветлӧмаӧсь кусӧдчыныс, кырымасьӧмаӧсь эськӧ вӧлі зэв унаӧн да.
Тадзи кӧ кутам ми видзӧдны вӧр сотчӧм вылӧ, регыд ми колям вӧртӧг. Унджык оз мунны кусӧдчыны колян во та понда, абу сетлӧмаӧсь некодӧс судӧ да. Тадзи оз позь водзӧ кольны, колӧ пырысь-пыр Обласьтувса Обисполком шуӧм кузя сетны сэтшӧм йӧзсӧ судӧ.
Тырмас нин сьӧд тшынӧн коми вӧр-яг вевттьыны.
Ю. Б.
