КОЛӦ БОСЬТЧЫВНЫ ГИЖНЫ ВИСЬТЪЯС

Ми лӧсьӧдім коми гижысьяслысь чукӧр (КАПП), медым водзӧ паськӧдны, ёнмӧдны коми литература, медым лӧсьӧдны бур, колан, выль коми литература, медым сэтшӧм коми гижӧмӧн отсасьны коми йӧзлы сюсьмыны, водзӧ тувччавны, выль бур олӧм лӧсьӧдны.

Но тайӧ уджсӧ вӧчигӧн миян Ассоциациялы оз ков сӧмын тӧждысьны гижӧм пытшкӧс вӧсна (мый йылысь гижны); миянлы колӧ тшӧтш тӧждысьны и гижӧм вылыс вӧснаыс (кутшӧм ногӧн гижӧма, кутшӧм кывйӧн и с. в.)

Позьӧ ӧд гижны зэв буртор йылысь, сӧмын сійӧ бурторсӧ некод оз гӧгӧрво либӧ некод оз лыддьы гижӧдсӧ, гижӧма кӧ лёка, сьӧкыда, гӧгӧрвотӧма.

Медым йӧзыс лыддясны гижӧмсӧ, медым ставыс, мый йылысь гижӧма гижысьыс, пырас юрас да инмас сьӧлӧмас лыддьысьыслы, медым лыддьысьыс пондас уджавны да овны гижӧд велӧдӧм серти, медым лыддьысьыс шойччас, долыда лыддяс лӧсьыд гижӧдсӧ (нигасӧ) — колӧ гижны гӧгӧрвоана кывйӧн, мичаа, кокньыда, шыльыда.^Ми тані сёрнитам мича, кокньыд, шыльыда гижӧм литература йылысь; велӧдчан да мукӧд пӧлӧс нигаяс гижӧны мӧд ногӧн./^

Тадзи позьӧ гижны кык ногӧн: стихъясӧн^Стихотворенньӧяс гижӧм йылысь печатайтім нин медводдза «Коми Гижӧм» номерын./^ либӧ висьтъясӧн, сёрни моз гижӧмӧн (быдсяма висьтъяс, пьесаяс да мукӧд.)

Коми гижысьяс пиысь зэв на этшаӧн гижӧны мӧд ногыс, унджыкыс гижӧны стихӧн. Зэв эськӧ колантор мичаа, шыльыда, стихӧн гижӧм, но миянлы сідзжӧ ёна колантор и мӧд ногӧн гижӧмыс, йӧз сёрни ног гижӧмыс; став коми гижысьыс оз вермы стихӧн гижны, оз быдӧнлӧн артмы, сэсся этша кывъя, кералӧм-лӧсалӧм (кӧть и мича) стихӧн гижӧмыд оз быдсӧн вермыны ставсӧ шуны, стихнад бура гижны сьӧкыд, сэсся ӧд рифмаястӧ да размертӧ лӧсьӧдалігад, этша кывйӧн унатор висьталігӧн он вермы петкӧдлыны коми кывлысь став мичлунсӧ, озырлунсӧ, сьӧкыд коми кывтӧ сӧвмӧдныд, сьӧкыд лӧсьӧдны бур литература кыв.

Миян уна гижысь чайтӧ: мичаа, шыльыда кӧ, позьӧ сӧмын стихӧн. Тайӧ абу збыль, позьӧ гижны зэв мича, шыльыд, кокньыда лыддян, сьӧлӧмӧ пыран гижӧд и висьт мозӧн — босьтам кӧть Тима Вень Чисталёвлысь ӧткымын гижӧдъяс (печатайтӧма «Коми му» журналын да кӧн да).

Миян зэв на этшаӧн гижӧны мичаа, шыльыда висьтъясӧн.

Колӧ ёнмӧдны коми литература, колӧ содтыны коми литература кыв тшӧтш и висьт моз гижӧмӧн.

Колӧ босьтчывны лӧсьӧдны тшӧтш висьт моз гижӧм бур коми литература.