АНГЛИЯ ДА ТУРЦИЯ КОСТ ДОГОВОР

Зэв нин дыр мунӧ зык Англия да Турция кост Мосул кар вӧсна. Мосул кар войдӧр вӧлі Турциялӧн, сӧмын 1918 воын сылысь мырддьыліс Англия. 1918 воын жӧ Турция да Англия кост лӧсьӧдӧм договор серти Англияыс Мосулсӧ кӧсйысьліс сетны бӧр Турцияыслы, да сӧмын кӧсйысьӧм кежсьыс кольлі. Мосул кар гӧгӧрыс эм вывті уна нерп да, Англияыд бурӧн оз кӧсйы лэдзсьыны Мосулсьыд.

Мосул йылысь сёрнитлісны Лозаннаса конференция вылын на ещӧ, сӧмын нинӧм эз вермыны лӧсьӧдны. Сэсся сетісны та йылысь лӧсьӧдны. Лига Нацияыд, дерт, Мосултӧ сетіс Англиялы. Турцияыд эз сӧгласитчы Лига Нацийыдкӧд да кӧсйис оружйӧӧн дорйыны ассьыс правасӧ, да эз вермы. Англияыд бӧрын воис ӧти кывйӧ Италиякӧд да Франциякӧд. Англияыд налы отсыштіс кӧнсюрӧ да водзӧссӧ тшӧктіс сувтны Мосултӧ мырддигӧн. Италияыд сэсся кутіс Турция вылӧ грӧзитчыны войнаӧн.

Турция война бӧрын эз на вермы кок йылӧ сувтны. Ассьыс овмӧссӧ лэптыны Турциялы лоӧ ещӧ дыр на, ӧні сійӧ зэв на гӧль. Сы вӧсна Турциялы лои бӧрыньтчыны. Сійӧ кӧсйӧ шойччыштны да ёнджыка ёнмыны. Ӧні Англия да Турция вӧчисны договор.