КЫДЗИ ТАВО КУТАСНЫ ЛЫДДЬЫНЫ БОКИСА ДОХОДЪЯС, НАЖӦТКАЯС СЕЛЬХОЗНАЛОГ ЛӦСЬӦДІГӦН
1926–27 во кежлӧ налог лӧсьӧдасны став доход серти. Учёт бӧрас да крестьяналысь норасьӧм видлалӧм бӧрас волисполкомын заводитасны лыддьыны доходъяс видз-муысь да скӧтысь нормаяс кузя.
Кыдзи нӧ лыддясны бокиса нажӧткаяссӧ?
Учёт вӧчигад юаласны крестьянинлысь: уна-ӧ сійӧ босьтӧма вогӧгӧрся доход, кутшӧмкӧ ремеслӧысь да мукӧд уджысь. Висьталӧмсӧ сылысь пасъясны поселённӧй списокӧ торъя графаӧ. Тайӧ висьталӧм серти оз на ещӧ пуктыссьы налогыд: крестьяниныд вермис чинтыны доходсӧ. Крестьянинлысь висьталӧмсӧ видлалас вӧлӧсьтувса налогӧвӧй комиссия, сы бӧрын шуас сылы доход бокиса нажӧткаясысь.
Став доходыс бокиса нажӧткаысь оз босьтсьы лыд вылӧ налог лӧсьӧдігӧн. Вӧлӧсьтувса налогӧвӧй комиссия чинтас став туйын муніг-локтігӧн вӧчӧм рӧскодсӧ, сэсся рӧскодъяс струментъяс ньӧбӧм вылӧ либӧ лӧсьӧдӧм вылӧ. Оз кӧ ачыс комиссияыс тӧд став рӧскод йылысь, юалас тӧдысь йӧзлысь либӧ босьтас учрежденньӧясысь справкаяс (леснӧй фирмаясысь) да мукӧд местаысь. Нинӧм кӧ рӧскод йылысь оз сюр, колӧ лӧсьӧдны Обисполкомӧн шуӧм прӧчент доход босьтӧм вылӧ.
Босьтам кутшӧмкӧ кӧзяйство, шуам, Ракинлысь. Учёт вӧчигӧн сійӧ висьталас сортовка лэдзӧмысь вогӧгӧрся доход 120 шайт. Поселённӧй списокас тайӧ 120 шайтсӧ пасъясны. Вӧлӧсьтувса комиссиялӧн эм справка лесрайонысь, мый Ракинлы мынтӧма 150 шайт. Комиссия арталас — уна-ӧ лун Ракин уджаліс вӧрын да уна-ӧ сылӧн муніс нянь-сов вылӧ рӧскод, ыджыд-ӧ рӧскод вӧлі струмент ньӧбӧм вылӧ. Шуам, сійӧ вӧрын уджаліс 60 лун, нянь-сов вылӧ рӧскод лун кежлӧ лоӧ 50 ур, 60 лунся рӧскод 30 шайт. Ракин ньӧбӧма выль чер да выль пила 10 шайт дон. Став рӧскодыс сылӧн лоӧма 40 шайт. Тайӧ 40 шайтсӧ вӧлӧсьтувса комиссия чинтас 150 шайтысь. Вотӧ пыран доходыс сортовка лэдзӧмысь лоӧ 110 шайт. Вӧлӧсьтувса комиссия татысь на вермас чинтыны. Ракиныс кӧ гӧля олӧ да кӧзяйствоас кӧ сылӧн унатор оз судзсьы, комиссияыс вермас 110 шайт пыдди пуктыны налогӧ пырана доходӧ сӧмын 50 шайт. Тадзи лючки лоӧ: сӧвет власьт оз зіль вотъясӧн орӧдны олӧм, сӧвет власьт зільӧ кыпӧдны крестьяналысь кӧзяйствосӧ. Налогсӧ кӧ крестьяналысь сӧвет власьт чукӧртӧ, бӧр не сы мында сетӧ налы мукӧдторъясӧн (челядьӧс велӧдӧм вылӧ, му-видз бурмӧдӧм вылӧ, дзоньвидзалун йӧзлысь кутӧм вылӧ да мукӧдтор).
Босьтам мӧдӧс. Кӧмкот вурысь Сивков сиктъясын уджалӧ. Ачыс висьталӧма вося доходсӧ зэв этша, 20 шайт. Вӧлӧсьтувса комиссиялӧн абу некытысь некутшӧм справка — уна-ӧ Сивков вайӧма гортас нажӧтка. Сэки колӧ комиссиялы артавны мукӧд вурсьысьяс серти Сивковлысь доходсӧ да юавны тайӧ удж тӧдысь йӧзлысь, уна-ӧ вермас середнӧй кӧмкот вурысь нажӧвитны вежонӧн. Сэсся колӧ тӧдмавны — кымын вежон Сивковыс ветліс. Сы серти и пуктас вӧлӧсьтувса комиссия доход.
Кыдзи колӧ доходсӧ лыддьыны, комиссияыс кӧ став бокиса доходсӧ, рӧскодсӧ оз тӧд?
Сэк кӧлӧ лыддьыны прӧчентӧн. Шуам, Пунегов, паськӧм вурысь, ветлӧма да нажӧвитӧма 300 шайт. Тайӧ тӧдӧ вӧлӧсьтувса комиссия. Кутшӧм Пунеговлӧн вӧлӧм рӧскод туй вылӧ, сёян-юӧм вылӧ да машина лӧсьӧдӧм вылӧ — комиссия оз тӧд. Сэки колӧ видзӧдлыны Обисполкомса шуӧм (постановленньӧ) вылӧ. Сэні шуӧма босьтны вурсьысьяслысь 70 прӧчент тайӧ доходысь. Куимсёысь 70 прӧчент лоӧ 210 шайт. Сідзкӧ вот лӧсьӧдігас Пунеговлы бокиса доходыс вурсьӧмсьыс пырис 210 шайт. Бара жӧ татӧн колӧ шуны: Пунегов кӧ омӧльджыка олӧ, кӧзяйствоыс сылӧн ичӧтик, няньсӧ семьяыс ньӧбӧмӧн сёйӧ, вӧлӧсьтувса комиссия сэк пуктас этшаджык 210 шайтысь, гашкӧ, джынсӧ пуктас, гашкӧ, этшаджык — сійӧ олӧм серти.
Служакъяслысь жалӧванньӧсьыс Обисполком шуӧма босьтны 25 прӧчент. Шуам, Морозов приказчикалӧ лавкаын, жалӧванньӧ босьтӧ 25 шайт тӧлысь. Сідзкӧ во гӧгӧрнас босьтас 300 шайт. Налогӧ пыран доходыс жалӧванньӧсьыс лоӧ сӧмын 75 шайт. Служакыс кӧ ылысса деревняысь да служитан местаас кӧ патера медалӧ, сылы сійӧ патернӧй рӧскодсӧ вогӧгӧрся жалӧванньӧсьыс колӧ чинтыны да сы бӧрын сӧмын босьтны 25 прӧчент. Мукӧд служакъясыс ылын служитӧны (карын, уездувса либӧ районса центрын), гортас найӧ ыстӧны жалӧванньӧсьыс отсӧг. Налы налогӧ лыддян доходас ыстӧм деньгасьыс колӧ сюйны сідзкӧ 25 прӧчент.
Школаын велӧдысьяслӧн, агрономъяслӧн, вӧр бердын служитысьяслӧн (лесничӧй, объездчик), пельшӧръяслӧн, милиционеръяслӧн да бӧрйӧм (выборнӧй) йӧзлӧн жалӧванньӧыс оз лыддьыссьы налог лӧсьӧдігӧн.
Кор став доходсӧ мусьыс, скӧтсьыс да бокиса нажӧткасьыс лыддясны, волисполком кутас вотсӧ лыддьыны быд крестьянинлы. Кыдзи лыддьыссьӧ налогыс, сы йылысь висьталам мӧдысь.
Щ.
