СЕЛЬПРОМКРЕДИТСОЮЗЫН

— Первойя паракодъясӧн Сельпромкредитсоюз ыстӧма удждысян тӧвариществояслы (кодъяс вӧчлӧмаӧсь заказ да мынтылӧмаӧсь задатки) анькытш кӧйдыс. Анькытш кӧйдыс ыстӧны Абъячойӧ 150 пуд, Ношульӧ 100 пуд, Сернӧсӧ 40 пуд, Визинӧ 50 пуд, Межадорӧ 96 пуд, Давса (Выльгорт вӧл.) с.-к. кружоклы 16 пуд, Сыктывдінкарса удждысян тӧвариществолы 135 пуд, Кӧрткерӧсӧ 4 пуд, Сереговӧ 80 пуд, Туръяӧ 100 пуд да Козловкаӧ 30 пуд.

— Недыр мысти локтасны плугъяс, пиняяс, косаяс, телегаяс, кӧдзан машинаяс да мукӧд сикас крестьяналы да прӧмышленникъяслы колан кӧлуй. Медводз сійӧ тӧварыс кутас ыстыссьыны задаткияссӧ водзвыв мынтысь да бурджыка уджалысь тӧвариществояслы.

— Союз мӧдӧдӧ Елецкӧй (Орловскӧй г.) кучик вӧчан заводӧ комиын вӧчӧм дьӧгӧдь дас сё пуд саяс. Вузалӧмаӧсь 3 шайтӧн пуд.

— Таво тулысын Печӧраса тӧчила гӧраысь вӧчӧмаӧсь 50 сюрс зуд да 2 сюрс пуд гӧгӧр тӧчила да лежни. Коми обласьт кындзи тӧчилаяссӧ да зудъяссӧ кӧсйӧны нуны мукӧд каръясӧ.

— Паракодӧн Госсельскладӧ (Сыктывдінкарӧ) локтӧны кӧйдысъяс: вика 250 пуд, бобӧнянь 100 пуд, шабді долгунеч 1000 пуд.

Сэсся паракодӧн жӧ локтӧ 40 идзас шыран машина, 8 вартан машина, 500 плуг, 20 кӧйдыс весалан машина, 15 тӧлӧдчан машина да 40 пиня зигзаг.

— Госсельсклад да Сельпромкредитсоюз арсяньыс вузалӧмаӧсь крестьяналы 2000 плуг. Тулысся вайлӧм видз-му уджалан кӧлуй ставыс нин вузалӧма. Ӧні удждысян союз виччысьӧ 1000 плуг.

Таысь кындзи ньӧбӧмаӧсь 100 телега, 7000 коса, вӧралан, плӧтничайтан, столяритан, слесаритан кӧлуйяс да мукӧд посниторъяс.

Тайӧ тӧварсӧ мӧдӧдӧны вӧлӧсьтувса удждысян тӧвариществояслы.

— Ӧні Госсельскладӧс ӧтлаалісны Сельпромкредитсоюзкӧд. Став видз-му уджалан кӧлуй кутас вузавны сӧмын Сельпромкредитсоюз, Госсельскладыс оз ло.