«ПУРЪЯСЬӦМ ДА ВӦР КЫЛӦДАН УДЖ ЫБ ВӦЛӦСЬТЫН»

Пуръясян да вӧр кылӧдан удж таво муніс омӧльджыка, эз ёнасӧ сэк кежлӧ лӧсьӧдчыны да. Кер лэдзысьясӧс чукӧртлісны сёрнитны кер кылӧдан медасьӧм йылысь, кор нин колӧ вӧлі кутчысьны удж бердас. Сы вӧсна лоины тырыс ӧшыбкаяс.

Кор ковмис медавны керсӧ кылӧдны, сэки сӧмын лэччисны карӧ донъяс тӧдмавны. Кор вӧлі нин чорыд донъяс лӧсьӧдӧма вӧрсӧ кылӧдны, содтісны ӧткымынлаын ӧти урӧн. Содтӧм бӧрын унаӧн пондісны надейтчыны — оз пӧ бара содтыны — да эз кутны медасьны. Сэсся медалісны кер кылӧдысьяссӧ эз ӧти кадӧ. Ыб саяс вӧлі кайӧмаӧсь нин, а Пальса-Чассаӧс сӧмын на медалӧны. Сідзтӧ эз ӧти кадӧ кайны ужавны да, уджалысьяслы лои торйӧдчыны уна чукӧрӧ. Уджыс муніс кыдзисюрӧ: воддза чукӧрыс пуръясис дай кывтіс, а мукӧдъясыс куим вежонӧн сідз олісны. Кор Лопъю шорысь ваыс пондіс ямны, вӧрыс мукӧд куим чукӧрыслӧн кутіс косьмыны, лои уна пӧлӧн берегысь йӧткавны ваӧ.

Сэсся ыджыд несӧглас лои Северолес да овмӧс кутан юкӧд (ОМХ) костын. Договор сертиыс, Овмӧс кутан юкӧдыс кӧсйысьліс кадӧ кылӧдны вӧрсӧ, сӧмын келӧдныс эз вермы дай куим лун кутіс кывтӧмысь Северолеслысь вӧрсӧ. Уджалӧм кыссис 6 вежонӧдз. Нянь запас бырӧм бӧрын уджалысьясыс кутісны асланыс уполномоченнӧйяс пыр корсьны туй пышйыны. Недырӧн пышйисны морт 30–40.

Та йылысь вӧлӧсьтувса юралысьяс тӧдлісны кык-куим лун бӧрын. Северолес контораса уджалысьяс абу кадын висьталӧмаӧсь округса управленньӧлы да, кадас нинӧм вӧчны эз позь. Сэсся вывті ёна торкис ыджыд лун праздник дырйи самӧкур юӧм. Содтӧд ещӧ лӧсьӧдісны 40 градуса вина.

Воддза воясся нелючкиторъяссӧ кер кылӧдан уджъяс абу бура вӧлі тӧдмалӧмаӧсь да договорас унатор абу сюйӧмась. Унатор йылысь на Всеработземлесыс оз тӧд местаяс вылын. Сы вӧсна Ыбса коммунист партия ячейка эз вермы кадын коланторъяссӧ индыны. Сэсся ещӧ вӧліны омӧльторъяс. Северолесса медалысьяс медалігас кӧсйысьӧны вӧлі сетны унаторъяс, а бӧрнас эз сетны. Уджалысьясыс кӧсйысьӧмторсӧ кабала вылӧ оз гижавны да сідзи и ылалӧны. Тадзтӧ овлӧны ыджыд зыкъяс, ужалысьяслӧн некутшӧм веритӧм медалысьяс вылӧ абу. Медсясӧ ужалысьясыс дӧзмӧны медалысьяс вылӧ скӧралӧмысь. Уджалысьяскӧд ньӧтчыд найӧ оз сёрнитны бурӧн, пыр горзӧны, найӧ бурӧсь сӧмын медалігас. Сэсся унаысь на эз овлы сӧглас уджалысьяс костас.

Таво бара донсӧ вермисны чегны озыръяс. Воддза медасьысьяслы уджалӧмысь мынтӧны кер лыдысь, налы этша воӧ доныс, а озыръяс бӧрнас медасисны да уджалӧны пӧденщинаӧн 2 шайт 50 урӧн лун. Озыръяс виччысисны вӧр косьмӧмсӧ. Пальса-Часса уджалысьяс пышйӧм бӧрын лои вӧчны тырыс мӧд пӧлӧс рӧскод.

Татшӧмторъяс аддзим комиссия уджалӧм бӧрын да ёна уджсӧ тӧдмалӧм бӧрын.

«Гим»