КУТЧЫСИСНЫ УДЖАВНЫ

Ёльса (Ыб в. Сыктыв у.) машиннӧй тӧварищество босьтіс мӧда-мӧдлы отсасян комитетлысь уджавны му, мед вермасджык мынтыны ассьыс уджйӧзъяссӧ му вывсьыс босьтан петасъяссӧ вузалӧмӧн. Муыс вель ыджыд. Гӧрӧм-пинёвтӧм бӧрын, юнь 10 лунӧ, кор енлы эскысь йӧз муналісны самӧй вичкоӧ (вӧлі Вознесенньӧ лун), машиннӧй тӧвариществоса шленъяс чукӧртчисны му вылӧ, коді чуманӧн, коді кӧрт зырйӧн, картупель пуктыны. Ӧтувтӧ уджавныд гажа, пыр серам вӧчӧны, удж ӧдйӧ содӧ. Ӧбедня сьылігкостіыд картупельыд и пуктыссис. Тадзи жӧ пондас тӧварищество уджавны му вылас и водзӧ. Тӧварищество кӧсйӧ таво гӧрны вадорысь турун петтӧм видзьяссӧ да мӧд во тулыс кӧдзны сэтчӧ турун.

Пытш.