ВОСЬТАМӦЙ ЮГЫД ТУЙ

Дыр нин ми, селькоръяс, пемыдӧн олім,

Пыр вӧлі син водзын пемыд да руд,

Юрнымӧс кыпӧдны вылӧджык полім,

Эг лысьтлӧ корсьлыны аслыным шуд.

Мый вӧлі сьӧкыдыс, дзескыдыс, лёкыс,

Огӧ нин казьтылӧ, кольӧма мед;

Ӧні ми ас нога олӧмӧ пырим,

Миянлы югыд туй воссьӧма мӧд.

Коми му пуксьӧма паськыда, кузя,

Коми му быдсяма эмбурӧн тыр,

Коми му вӧр улын вӧрзьывтӧг узьӧ,

Коми му виччысьӧ садьмӧдӧм пыр.

Лолыштӧй сьӧлӧмысь, коми селькоръяс,

Ӧдйӧнджык ловзьӧдӧй сьӧд Коми му,

Шеныштлӧй, кыпӧдлӧй, вынъяса сойяс,

Горӧдлӧй: «Садьмы нин, эй, Коми му!..»

Миянлы съездыд нин бур туйӧ индіс,

Уджавны кесйӧдіс югдӧдіс юр,

Сьӧкыдін кокньӧдіс, тӧдтӧмтор чинтіс,

Нуӧдіс водзӧ пыр, висьталіс бур.

Сьӧлӧмъяс ловзьӧдіс, сюсь йӧзӧ воштіс,

Висьталіс миянлы быдсяматор,

Дышъясӧс дивитіс, зіль йӧзӧс ошкис,

Быдлаӧ судзсьыліс сылӧн кыввор.

Чеччӧй жӧ, вокъясӧй, кутчысьӧй уджӧ, —

Ас вӧсна ньӧтчыд — ті эн олӧ жуй;

Энӧ жӧ газетад гижӧмысь мудзӧй —

Восьтамӧй зэв паськыд, зэв югыд туй!