ОТСӦГ ЛОӦ

Куим тӧлысь коли Коми Гижысьяс Ассоциация лӧсьӧдӧмсянь. Медводз шыасис, ошкыштіс КАПП лӧсьӧдӧмысь Кӧрткерӧсса селькор. Шыасисны Коми Обласьтса коми гижысьяс, шыасисны коми гижысьяс мукӧдлаысь. Шыасис тшӧтш, кӧсйысис отсавны ВАПП.

А водзӧ? Сэсся некод, карса ни сиктса, эз шыась: эз вид ни эз ошкышт (кодлы нӧ кутшӧм мог коми литератураӧдз?) Кодсюрӧ, сюсь, велӧдчӧм войтыр пиысь, доршасисны торкны на, дзугны миянӧс, корсюрӧ ёна букышӧн видзӧдлывлісны....

Ми виччысим селькоръяслысь съезд. Чолӧмбыттьӧ КАПП правленньӧсянь, коми гижысьяслӧн шыасьӧмъяс, чолӧмбыттьӧяс съезд восьтігӧн... — ми чуксалім селькоръясӧс миянкӧд ӧтув лӧсьӧдны коми газет, коми литература коми йӧзлы, чуксалім мӧда-мӧдлы отсасьӧмӧн бура уджавны.

Селькоръяс эз чӧв овны, найӧ шыӧдчисны. КАПП йылысь доклад кывзӧм бӧрын со мый шуис съезд: «Селькоръяс тӧдӧны гижӧдлысь коланлунсӧ выль олӧм лӧсьӧдігӧн, тӧдӧны отсӧгсӧ сылысь уджалысь йӧзлы выль ногӧн овны велӧдчигӧн, тӧдӧны коми гижӧмлысь коми йӧзлы коланлунсӧ, тӧдӧны — коми литература этша на, бур коми литература кыв абу на артмӧма, коми гижӧд омӧля на воӧ коми крестьянаӧдз — та понда коми селькоръяслӧн медводдза съезд ошкӧ КАПП лӧсьӧдӧм.

Селькоръяс — сэтшӧм жӧ гижысьяс, сӧмын газетӧ гижӧны посньыдикторъяс. На пиысь вочасӧн кутасны петны выль коми гижысьяс. Колӧ селькоръяслы ёнджыка кӧртасьны КАПП-кӧд, сылысь велӧдчыны коми гижӧм лӧсьӧдны да отсавны сылы уджавны: висьтавны КАПП йылысь сиктъясын, сетны бурджык гижысьясӧс селькоръяс пиысь, отсавны лӧсьӧдны мича, гӧгӧрвоана коми литература кыв, разӧдны крестьяна кост коми литература.

Медым бурджыка мунас КАПП-лӧн уджыс, колӧ босьтчыны лэдзны коми литература журнал: позьӧ кӧ — дзикӧдз торйӧн, сьӧкыд кӧ лоӧ (средство оз ло ли, мый ли) — лэдзны газет бердын».

Дженьыда, да уна шуӧма. Тайӧяс, медводзын мунысь сиктса войтыр, сиктса ловъя войтыр, партиялы да сӧвет власьтлы сиктын отсасьысьяс, кӧсйӧны КАПП-лы отсасьны.

Ми чайтам — тайӧяс кутасны отсавны.

Ми чайтам — ӧні коми сикт, коми йӧз пондасны тӧдны КАПП-ӧс, коми гижӧдлысь коланлунсӧ, ми чайтам, коми гижӧм матыстчас коми йӧз бердӧ.

Коми селькоръяс шуисны ассьыныс кыв, найӧ сёрнитісны коми сиктса йӧз нимсянь. Ӧні виччысям КАПП-ӧс пыдди пуктӧм, виччысям сылы тшӧтш отсӧг карса сюсь войтырсянь, велӧдчӧм войтырсянь.