МУЯС, ВИДЗЬЯС ВИДЗӦЙ СКӦТ ТАЛЯЛӦМЫСЬ!
Потшӧсъяс колӧ лӧсьӧдавны
Коми обласьт пасьта быд тулыс да гожӧм мунӧ крестьяна костын ыджыд зык. Муяс да видзьяс талялӧмысь да бырӧдӧмысь ёна дӧзмӧны да видчӧны крестьяна. Омӧль, киссьӧм потшӧсъяс вӧсна коми крестьяналӧн вошӧ быд во зэв уна турун видзьяс вылын, ещӧ унджык бырӧны кӧдзаяс йӧръясын.
Эмӧсь Коми обласьт пасьта сиктъяс, кӧні вӧвъяс да ыжъяс гожӧмбыд оз и петавны йӧръясысь да видзьяс вылысь. Сэсся потшӧс потштӧм вӧснаыд скӧтыд йӧрад пырас да, унаысь скӧтнысӧ кералӧны да виӧны. Сэтысь крестьяна бара дӧзмӧны. Скӧтыс пӧ мыжа ӧмӧй йӧръясӧ пырӧмысь? — Дерт жӧ, абу. Мыжаыс сэн омӧлик крестьянин.
Сідз водзӧ кежлӧ кольны оз позь. Колӧ ӧнісянь жӧ волисполкомъяслы чорыда босьтчыны тайӧ удж бердӧ, сиктса исполнительяслы колӧ ӧні жӧ видлавны йӧръяс да видзьяс гӧгӧр потшӧсъяс.
Волисполкомъяслы позяс потшӧсъяс лӧсьӧдӧм вӧсна лэдзны шуӧмъяс (обязательные постановления). Медым йӧзыс гӧгӧрбок тӧдлісны волисполкомъясӧн лэдзӧм шуӧмъяссӧ, волисполкомъяслы ассьыныс шуӧмъяссӧ колӧ паськыда йӧзӧдны ывла вылын ляскалӧмӧн, скодъяс вылын лыддьӧмӧн да крестьяналы висьталӧмӧн, мый вӧсна сэтшӧм шуӧмсӧ лои лэдзны.
Медым некод нин эз вермы ыстысьны волисполкомса шуӧм тӧдтӧм вылӧ, шуӧмын лоӧ висьтавны, кор шуӧмыс вынсяммӧ. Волисполкомъяслӧн став шуӧмъяс вынсяммӧны кык вежон мысти йӧзӧдӧмсяньыс.
Волисполкомъяс вермӧны мыждыны коді оз кывзы да оз вӧч шуӧмъяс серти штрап пуктӧмӧн да уджӧдӧмӧн. Медыджыд штрапсӧ волисполком вермӧ пуктыны 3 шайт, медуна лун уджӧдны — 5 лун.
Тадзинас, миян ногӧн, позяс омӧлик кӧзяинъястӧ тшӧктыны лӧсьӧдавны потшӧсъяссӧ.
Сӧмын оз позь думайтны, мый штрапъясӧн позяс бырӧдны видзьяс, муяс талялӧм. Ыджыд удж на лоӧ нуны сиктъясын велӧдысьяслы, избачьяслы, комсомолечьяслы да тӧждысьысь крестьяналы. Ковмас висьтавны, мед быд крестьянин гӧгӧрвоис, кутшӧм омӧль вайӧ муяс да видзьяс вылын скӧт видзӧм.
Кад нин та йылысь думыштны коми крестьяналы да видзчысьны видзьяс, муяс талялӧмысь, бырӧдӧмысь.
Кӧдзаяс, турунъяс ёна заводитчисны быдмыны, видзӧй талялӧмысь да бырӧдӧмысь — лӧсьӧдӧй потшӧсъяс!
Н. К.
