ВИДЗӦЙ ВӦРЪЯС СОТЧӦМЫСЬ

Вӧр — озырлуныс комилӧн. Вӧрысь коми крестьянин босьтӧ нажӧткасӧ, кынӧмпӧтсӧ.

Сӧмын уналаын на тайӧ озырлунсӧ войтырыд пыдди оз пуктыны. Кыдзи вермӧны найӧ — сідзи и жугӧдӧны вӧрсӧ. Чередитӧм некутшӧм абу. Татшӧм чередиттӧмнад вермам ми, вӧр пиын олысьяс, кольны вӧртӧг — пес пуыд весиг бырӧ.

Асланым идӧртӧмла джын вӧрыд сісьмӧ. Кертӧ вӧчам, пестӧ кералам — джын пусӧ колям муас. Увъяссӧ гӧгӧрбок шыблалам. Колясыс, ӧти-кӧ, сісьмӧ, мӧд-кӧ — мешайтӧ мукӧд пуыслы быдмыныс, а коймӧд-кӧ — паськӧдӧ пӧжаръяс.

Коми му пасьта колян во гожӧм сотчис 90,343 десятина вӧр. Сотчӧм вӧрыс сулалӧ 445,805 шайт. Со кутшӧм ыджыд убыткаяс вайӧны вӧр сотчӧмъяс. Коді сэсь мыжа? Дерт, асьным мыжаӧсь. Огӧ пелькӧдӧ вӧрсӧ дай бияснад вӧдитчам кыдзи веськалӧ.

Статистика петкӧдлӧ колян во гожӧмся пӧжаръяс йылысь сэтшӧмтор: нёльысь вӧр пӧжар вӧлӧма нарошнӧ ӧзтӧм вӧсна, 72-ысь — кыдзисюрӧ биӧн вӧдитчӧм вӧсна, 132-ысь — тӧдмавны абу вермӧмаӧсь. Унджыкысьсӧ 132 письыс лоис пӧжарыс, дерт, кыдзсюрӧ биӧн вӧдитчӧм вӧсна.

Сӧвет власьт быд ногыс старайтчӧ паськӧдны, бурмӧдны вӧрсӧ.

Обласьтувса исполком таво лэдзис шуӧм (постановленньӧ) вӧр сотчӧмъяскӧд вермасьӧм йылысь. Обласьтын, уездъясын да вӧлӧсьтъясын лӧсьӧдалӧны нарошнӧ комиссияяс вӧр сотчӧмъяскӧд косясьӧм вылӧ.

Кутшӧмкӧ организация кӧ кутас лӧсьӧдны гожӧмнас вӧрсӧ — сійӧ тшӧт вылӧ медасьӧ нарошнӧ морт вӧрсӧ видзны. Кутасны видзны кераланінсӧ дай петкӧданінсӧ (лэдзанінсӧ).

Ӧні нуӧдсьӧ быд лесничество улын конференцияяс. Сэтӧні сёрнитӧны вӧр видзӧм йылысь. Быд вежӧра мортлы конференцияяс вылас колӧ ёна сёрнитны вӧр видзӧм йылысь.

Миян асланым киын озырлун — колӧ чорыда сійӧс чередитны.

Акинь пи.