АНГЛИЯСА КАПИТАЛИСТЪЯС ПАДМӦДӦНЫ ИЗ ШОМ ПЕРЙЫСЬ РАБОЧӦЙЯСӦС

Англияса из шом перйысь рабочӧйяс оз дугдыны бастуйтӧмысь. Налы эськӧ нажӧткатӧг овны зэв делӧ, да пыр на найӧ ӧтвылысь кутчысисны, оз кӧсйыны сетчыны капиталистъяслы. Правительствоыс быд ногӧн зільӧ дугӧдны забастовкасӧ, торкӧ рабочӧйяслы, сӧмын миллион саяд из шом перйысь рабочӧйтӧ оз вермы тшӧктыны сувтны удж вылад. Правительствоыслы да капиталистъясыслы тшӧтш отсалӧны ӧткымын нырщикъясыс рабочӧйяслӧн. Сӧмын нинӧм некод оз вермы отсавны.

Ӧні англияса капиталистъяс аддзисны бара ӧтитор, сійӧн кӧсйӧны падмӧдны из шом перйысь рабочӧйяссӧ. Быд государствоясын рабочӧйяс чукӧртӧны сьӧм англияса из шом перйысь рабочӧйяслы отсӧг вылӧ. Миян Сӧвет республикаын рабочӧйяс зэв жӧ сьӧлӧмсянь ставыс кутчысисны отсавны англияса из шом перйысь рабочӧйяслы. Англияса капиталистъяс газетъясын кутісны гижны, тайӧ сьӧмсӧ пӧ рабочӧйяслы отсӧг вылӧ ыстӧны оз профсоюзъяс рабочӧйяслысь чукӧртӧм сьӧм, а ыстӧны Сӧвет правительствоыс, мед пӧ Англияын оласногыс торксяс, Сӧвет правительство пӧ пыр зільӧ путкыльтны англияса оласног. Тадзтӧ капиталистъяс кӧсйӧны падмӧдны ассьыныс из шом перйысь рабочӧйясӧс, дугӧдны миян рабочӧйяссянь сьӧм босьтны. Ӧні весиг англияса правительствоыс кутіс мыждыны Сӧвет правительствоӧс англияса рабочӧйяслы отсалӧмысь, ыстіс миян правительстволы нота. Дерт, Сӧвет правительство ачыс эз отсавлы англияса рабочӧйяслы, а рабочӧйяс отсалӧмысь сійӧ некор оз дугӧд, абу миян прӧста рабочӧй да крестьяна правительство. Англияса рабочӧйяс казялісны жӧ капиталистъясыслысь да правительствоясыслысь ылӧдлӧмсӧ. Найӧ зэв ыджыд аттьӧ висьталӧны Сӧвет республикаса рабочӧйяслы отсӧг вылӧ.

Н.—Уль.