ВЕРМЫТӦМ КРЕСТЬЯНА, ӦТУВТЧӦЙ!

Ленин ёрт тшӧктіс крестьяналы чорыда ӧтувтчыны рабочӧйяскӧд. Ӧтувтчӧмас став выныс Сӧвет власьтлӧн. Сытӧг ми огӧ вермӧй вермасьны озыр йӧзкӧд, кыпӧдны ассьыным овмӧс да государство. Тайӧ шуӧм серти мунӧ быдлаын удж.

Сиктъясад абу став крестьянаыс ӧткодь. Эмӧсь гӧль, шӧркоддьӧма да озыр йӧз. Озыр войтырыд пыр на видзӧдӧны кыдзкӧ жмитны, нартитны вермытӧм йӧзтӧ. Найӧ пыр на мунӧны паныд сӧвет власьтлы, кыскӧны олӧм важлань. Мукӧд сиктын найӧ босьтӧмаӧсь ас кипод улас став власьтсӧ, оз сэтчӧ сибӧдны гӧль крестьянаӧс.

Коммунист партия важыс моз сулалӧ уджалысь йӧз дор. Сійӧ оз вермы эновтны гӧль йӧзӧс, отсалӧ налы вермасьны кулакъяскӧд. Коммунист партия тшӧктӧ гӧль йӧзлы бурджыка, топыдджыка ӧтувтчыны шӧркоддьӧма крестьянакӧд. Кор карвывса рабочӧйяс да сиктса гӧль крестьяна ёнджыка ӧтувтчасны шӧркоддьӧма олысь крестьянакӧд, сӧмын сэки усьӧ лачаыс, бырӧ выныс озыр войтырыдлӧн.

Сиктса кулакъясыд век шуӧны: став крестьянаыс пӧ ӧткодьӧсь, гӧляд пӧ воӧны сӧмын дышӧдчӧмысь. Татшӧм кывъяснад найӧ зільӧны кыскыны ас бердас шӧркоддьӧма олысь крестьянасӧ. Ӧти-мӧдлаын бура кывзӧны татшӧм пӧръясьӧмъястӧ. Шӧркоддьӧма крестьяна мунӧны ӧтлаын озыр йӧзкӧд, топӧдӧны, личкӧны беднякъястӧ.

Гӧль йӧзлы колӧ медводзын аслыныс бура ӧтувтчыны коммунист партия индалӧм серти. Мукӧд губерняясын важӧн нин кутісны нуӧдны тайӧ уджсӧ. Сӧветӧ да кооперативъясӧ бӧрйысьӧм водзын сэні гӧль йӧз вӧчалӧны асьныс собранньӧяс. Татшӧм чукӧртчӧмъясыс зэв колантор. Водзвыв чукӧртчытӧдзыд гӧль йӧзлӧн нинӧм оз артмы, выныс оз шед, но озыр войтыр вӧчасны мый налы колӧ. Татшӧм чукӧртчӧмъяс вылас позьӧ лэдзны, корны шӧркоддьӧма олысь крестьянаӧс, сетны налы сёрнитны. Оз ков сӧмын вунӧдны, мый татшӧм собранньӧяс вылын решенньӧяссӧ вӧчӧны гӧль йӧз.

Воасны кӧ татчӧ кулакъяс да оз чӧв пукавны, найӧс колӧ вӧтлыны. Чукӧртчӧмъяс колӧ вӧчлыны сідзжӧ му-видз юклӧм водзын да мукӧддырйи, кор колӧ вермасьны озыръяскӧд, бурджыка сувтны налы паныд. Колӧ тӧдны, мый гӧль войтырлы ӧтнаныслы сьӧкыд вермасьны озыръяскӧд. Сы вӧсна ми тшӧктам бӧрйысигӧн пуктавны сӧветъясӧ да кооперативъясӧ сэтшӧм войтырӧс, коді шогмӧны сідзжӧ шӧркоддьӧма олысь крестьяналы.

Чукӧртчӧмъясысь ӧтдор, гӧль йӧзлы колӧ бурджыка топӧдчыны коммунист ячейкаяс бердӧ. Ячейка гӧгӧрыс позьӧ вӧчны сэтшӧм чукӧр, коді кутас отсавны ячейкаяслы кыпӧдны удж вӧлӧсьтувса сӧветъясын, мӧда-мӧдлы отсасян комитетъясын, кооперативъясын, вермасьны гӧль йӧз дор. Тайӧ чукӧръяссӧ (группа бедноты) оз позь лыддьыны важ нога, 1918-вося «комитет беднотыӧн». Сэки комитетъясыд уджалісны паськыда, нуӧдісны уджсӧ сӧветъяс моз.

Ӧнія чукӧръясын панӧ, лӧсьӧдӧ уджсӧ коммунист ячейка сӧмын сы вӧсна, мед гӧль йӧз ӧтувтчӧмӧн вермисны нуӧдны ассьыныс туй, коланторъяссӧ сӧвет, кооператив да мӧда-мӧдлы отсасян комитет пыр.

Сӧвет власьт сетӧ гӧль да шӧркоддьӧма олысь йӧзлы ыджыд отсӧг. Уджйӧзӧн сетсьӧ кӧйдыс, машинаяс, сьӧм. Дерт, оз на быд гӧль морт тӧд, мый ӧні отсӧг мунӧ сӧмын овмӧс кыпӧдӧм вылӧ, оз сетсьы важ нога «паёкъясыд». Миян сиктъясын гӧль йӧз олӧны ӧтувтчытӧг. Вӧлӧсьтувса сӧветъяс, кооперативъяс омӧля на сетӧны налы отсӧг. Водзӧ вылӧ колӧ бурджыка кутчысьны тайӧ уджас, кыпӧдны вежӧрсӧ гӧль йӧзлысь, отсавны налы петны озыр йӧз кабыр улысь.