ТУЛЫСЫН

Кутшӧм ӧд гажа тулысын овнысӧ!

Ывлаыс ловзьӧма, олӧ;

Пуяс и, муыс и, — гӧгӧр вежӧдӧ;

Эжва ю ыджыд — кырсьыс петӧма,

Увтасінъяс гӧгӧр босьтӧма:

Видзьяс, ольяс ва улӧ бердӧмаӧсь, —

Пасьтала — ва, рӧмпӧштан моз дзирдалӧ.

Локтӧны саридзысь чӧжъяс, дзодзӧгъяс,

Уна пӧлӧс мича сьылысь лэбачьяс;

Долыда горзӧны, дугдывтӧг сьылӧны,

Ылі муысь юӧръяс вайӧны.

Чӧжъясӧс кыйсьысьяс шкувгӧны-лыйсьӧны,

Ва кузя шков! — гораа кылӧ.

Паракодъяс гежмалӧны Эжвасӧ,

Зэвтчӧма-сь, кыскӧны нянь тыра баржаяс,

Вайӧны тӧвар, быдсяматорсӧ;

Сувтанінӧ воигӧн гораа горзӧны:

— «Ту, ту, ту!.. Ставныдлы чолӧм,

Долыдлун да бур шудъяс —

Пармаӧ, сиктъясӧ, быдлаӧ ылӧ зэв!»

Гораа юркнитас — кылас,

Йӧлӧга мӧд пӧв лӧвтыштас кузя.

Горӧдӧм шыӧ коми йӧз — гырысь и посни —

Кашкӧмӧн котӧрӧн лэччӧны.

Батьяс да мамъяс пияннысӧ

Армияысь, карысь, велӧдчанінысь

Сьӧлӧмсьыныс виччысьӧны,

Том ичмоньяс — мужикъяссӧ,

Мича нывъяс — мусукъяссӧ.

Эжва дорӧ чукӧртчӧма-сь,

Виччысигмоз гажӧдчӧны —

Ворсӧны, йӧктӧны,

Коми сьыланкывъяс

Лӧсьыда сьылӧны.

Сё майбырӧй, гажа жӧ нин

Тулыснад овнысӧ!