КОЛӦ ГИЖНЫ

Коми гижысьяс ассоциациялӧн (КАПП-лӧн) удж оз кут водзӧ мунны, коми литература водзӧ оз тувччы, оз кӧ понды коми гижысьяслӧн гижӧдъяс да КАПП-лӧн уджалӧмыс некӧн печатайтчыны. Тадзи ми важӧн нин шулім, печатайтчан туйяс ми пыр на пессим корсьны.

Медбур, дерт, лӧсьӧдны неыджыд коми литература журнал, но ӧні кежлӧ эз на нинӧм артмы та йылысь. «Коми му» журналын вӧлі коми литература юкӧд — важӧн жӧ нин куслі; огӧ тӧдӧй, водзӧ кежлӧ коркӧ «Коми му»-ын аддзылам огӧ коми кывтӧ.

Мый лоӧ водзӧ — видзӧдлам. Ӧні мый миян эм? Эм миян быд вежонын ӧти лист бок «Коми сикт» газетын — «Коми гижӧм». Этша эськӧ да, мый нӧ керан. Колӧ кӧть тайӧ ичӧтик лист боксьыс унджык бур босьтны — колӧ КАПП удж йылысь гижны, колӧ петкӧдлыны коми гижӧм, колӧ индыны сылы сӧвман туйяс, веськӧдны колан туй вылӧ.

Ми ногӧн, позьӧ сэтчӧ гижны: а) кутшӧм уджъяс ӧні КАПП водзын, б) кыдзи да мый йылысьджык гижны комиӧн, в) коми гижысьяслӧн бурджык, коланджык гижӧдъяс, г) торъя коми гижӧдъяс йылысь сёрнияс, налысь бурлунсӧ-омӧльлунсӧ индалӧмъяс, д) ВАПП да КАПП быдлунъя удж йылысь, лоӧмторъяс йылысь, е) юасьӧм-висьтасьӧм.

Дерт, та мында йылысь да бура оз вермыны гижны ӧти-кык морт КАПП правленньӧысь. Медым бура петас «Коми гижӧм» лист бок, колӧ гижны быд коми гижысьлы — коді нин пырӧма КАПП-ӧ дай коді на кӧсйӧ пырны сэтчӧ. Тадзи сӧмын ми пондам бура мӧда-мӧдӧс петкӧдлыны, мӧда-мӧдӧс тӧдны, бурджык туйяс корсьны, лючкиджык уджавны.

Водзӧ пондам мырсьыны тайӧ «Коми гижӧм» лист боксӧ пӧртны коми литература журналӧ. Ми чайтам, ёна дыр виччысьны коми гижысьяслы печатайтчанін оз жӧ кӧ ло-а. Колӧ тшӧтш «Коми гижӧм» лист бокад та йылысь гижны — колӧ оз коми литература журнал, кутшӧмджык колӧ, кутшӧм ним пуктыны и с.в.

Коми гижысьяс, гижӧй асланыд «Коми гижӧм» лист бокӧ!

А. Ч.