ДӦЗЬӦРИТӦЙ ЧИПАНӦС

Бура видзӧмӧн, бура дӧзьӧритӧмӧн чипан вермас вайны кӧзяйствоӧ зэв ыджыд доход. Америкаын чипанъясыс вайӧны куимсё колькйӧдз во вылӧ. Ставыс сійӧ дӧзьӧритӧм сайын. Ӧні сёрнитыштам, кутшӧм ногӧн колӧ видзны чипанъясӧс.

Войдӧр: Пӧжсигӧн чипан улӧ пуктыны гырысьджык кольк — бурджык чипанлысь, коді ёнджыка колькъялӧ. Воысь воӧ бӧрйӧдлӧм колькъяс пӧжигӧн позьӧ рӧдмӧдны гырысь-бур чипан рӧд. Медым тӧдмавны, кутшӧм чипан частӧджык колькъялӧ, колӧ нуны тшӧт — лыддьыны. Кад лыддьӧм вылас мунас неуна, а пӧльзаыс лоӧ ыджыд. Гырысьджык колькъяссӧ (медым мукӧдыскӧд оз сорсьыны) колӧ тэчны торйӧн либӧ пасъявны.

Мӧд: Тулысын дай гожӧмын чипанӧс колӧ видзны ывла вылын. Медым оз ылавны горт дінсьыс, асылын да рытын сылы неунаӧн колӧ сетыштлыны зӧр либӧ посньыдика шырӧмӧн петшӧр ӧтруб сорӧн. Юан ва пуктыны мича ворйӧ да вежлавны, медым пыр вӧлі свежӧй. Дзикӧдз кӧ дугдан вердӧмысь, чипаныд колькъялӧмысь дугдас либӧ кутас вайны посньыдик кольк.

Коймӧд: Чипанӧс колӧ велӧдны ӧти местаӧ колькъявны. Позсӧ (кытчӧ чипаныс колькъялӧ) колӧ видзны сӧстӧма. Няйтӧсь, мисьтӧм позъяд колькъялігӧн чипанъяс регыд висьмасны, дай колькйыс няйтӧссьӧ. Ваӧн колькъяс мыськавны некор оз ков — мыськалӧм кольк регыдӧн тшыкӧ. Медым дырджык видзны свежӧйӧн, позйысь босьтӧм бӧрын кольксӧ колӧ мавтыштны свежӧй шабді выйӧн. Видзны колӧ ыркыдінын.

Нёльӧд: Пӧжсьыны чипанӧс колӧ пуктыны ывла вылӧ либӧ сарайӧ, сӧмын мед эз вӧв ёна кӧдзыд.

Бӧрйӧм, гырысь колькъяснад колӧ вежны ассьыс вайӧм колькъяссӧ, кор чипаныс прамӧя нин пӧжсьыныс заводитчас. Бӧрйӧм колькъяс мед вӧліны свежӧйӧсь. Куим недельысь кӧ дыр колькйыс куйліс, сэтысь чипанпи оз нин вермы петны.

Пӧжсянінын медым вӧлі чипанлы сёян-юан. Оз ков повны колькъяс кӧдзалӧмысь — сійӧ омӧльсӧ некутшӧмӧс оз вай.

Петӧм мысти чипанпиянӧс оз ков вердны кык сутки. Коймӧд сутки вылӧ налы позяс сетыштны пуӧм кольк зэв посньыдика шырӧмӧн. Нёльӧд лунъяснас позяс сетны йӧв вылын пуӧм шыдӧса рок. Кык недель мысти позьӧ заводитны велӧдны шыдӧсъяс дінӧ, а тӧлысь мысти позяс вердны ӧткодя гырысь чипанъяс моз.

Зэв бур первойя лунъяссяньыс неуна сетыштавны шырӧмӧн свежӧй капуста кор, петшӧр да мукӧдтор.

Дӧзьӧритӧм сайын став доходыс чипанлӧн.