МЫЙЛА ВУЗАЛӦНЫ 40 ГРАДУСА ВИНА

Таво тулысын Госспирт восьтіс 12 вина лавка обласьт пасьта. Неважӧн тайӧ лавкаясын заводитісны вузавлыны 40 градуса вина «русскӧй горкӧй».

Вина вузалӧм йылысь быдсяма сёрни мунӧ йӧз костын. Беспартийнӧй конференцияяс вылын крестьяна юасьӧны вӧлі: «Мыйла Сӧвет власьт вермасьӧ самӧкур пуӧмӧн, вина юӧмӧн, а ачыс лэдзӧ да вузалӧ 40 градуса „русскӧй горкӧй“? Кыдзи нӧ пӧ ӧні вермасян юӧмкӧд, кыдзи бырӧдан самӧкур пуӧмсӧ?»

Бӧръя юасьӧм вылӧ позяс висьтавны крестьяна конференция вылын жӧ шуӧмӧн. Выльгортса беспартийнӧй конференция вылын крестьяна шуисны: «Самӧкур пуӧм да юӧм позяс ёна чинтыны да бырӧдны донтӧм 40 градуса вина лэдзӧмӧн». Сідзкӧ крестьяна асьныс нин гӧгӧрвоӧны, мыйла Сӧвет правительствоыс лэдзӧма «русскӧй горкӧй».

Уна во нин Сӧвет правительство вермасьӧ самӧкур пуӧмӧн да юӧмӧн. Быдӧн тӧдӧны: вӧлі вояс, чорыда судитлісны самӧкур пуысьясӧс дай ӧні на ёна мыждӧны самӧкур вӧчӧмысь. Сӧмын тайӧ вермасьӧмыс, уна вося зільӧмыс эз вермы бырӧдны самӧкур пуӧмсӧ. Самӧкур пуӧмыс эз быр, сійӧ паськаліс став республика пасьта.

Эгӧ кӧ вермӧ ми бырӧдны самӧкур, бурджык нин лоӧ лэдзны «русскӧй горкӧй».

Видзӧдламӧй. Самӧкур юны зэв омӧль, самӧкурыс ёна омӧльтӧ мортсӧ. Сэсся кымын миллион пуд нянь быд во мунӧ самӧкур вылӧ. Та кындзи быд вӧлӧсьтын, быд сиктын эмӧсь ӧні самӧкур вӧчысьяс да вузалысьяс. Сӧмын зэв ичӧт прӧчент самӧкур вӧчысь костын гӧль крестьяна, самӧкур вӧчысьяс-вузалысьяс озыр йӧз, кулакъяс. Найӧ самӧкур вузалӧмӧн гӧль крестьяна грӧшъяс вылӧ кӧсйӧны озырмыны. Сідзкӧ бурджык нин лоӧ, мед вина вылӧ видзӧм сьӧм муніс государство казнаӧ, мед Сӧвет власьт тайӧ деньга вылӧ вермис нуӧдны югдӧдчан удж.

Со мый вӧсна лои Сӧвет правительстволы лэдзны 40 градуса вина. Ӧти шуӧмъясӧн да тшӧктӧмъясӧн дыр эськӧ лои бырӧдны самӧкур вӧчӧмсӧ, лои корсьны мӧд туй — донтӧм да унджык градуса вина лэдзӧм — сійӧ туйыс.

Вина лэдзӧм бӧрын оз на позь думайтны: ӧні пӧ юны позьӧ, юӧмысь пӧ ӧні оз нин кутны да штрапуйтны. Сӧвет власьт оз дугды вина юӧмсӧ бырӧдӧмысь.

Колӧ кыдз верман паськӧдны югдӧдчан удж, кымын йӧзыс лоӧны велӧдчӧмӧсь, сымын ӧдйӧ бырӧ вина юӧмыс. Сӧвет власьт ёна паськӧдӧ югдӧдчӧм уджсӧ, восьтавлӧ зэв уна школаяс, лыддьысян керкаяс. Сідзкӧ вина юӧмыс тадзинас ачыс бырӧ, сэк нинӧмла лоӧ лэдзны винасӧ да пуны самӧкур, самӧкур вӧчӧмыс ачыс бырас.

Со кыдзи кӧсйӧ Сӧвет правительство вермасьны самӧкур пуӧмӧн да вина юӧмӧн, сӧмын быдӧнлы колӧ ёна отсавны Сӧвет правительстволы нуӧдны югдӧдчан уджсӧ.