ВОЕННӦЙ РӦСКОДЪЯС СССР-лӧн ДА КАПИТАЛИСТ ГОСУДАРСТВОЯСЛӦН

Капиталист государствояс костын унаысь нин заводитчыліс сёрни военнӧй оружйӧяс чинталӧм йылысь. Неважӧн Швейцарияын сёрнитны разоружитчӧм йылысь чукӧртчыліс сӧвещанньӧ, сӧмын сӧвещанньӧ вылын нинӧм эз вермыны лӧсьӧдны, капиталист государствояслӧн разоружитчӧмыс вӧлӧма прӧста сёрни.

Капиталист правительствояс кымын уна сёрнитӧны разоружитчӧм йылысь, сымын ёна ёнмӧдчӧны оружйӧӧн. Военнӧй рӧскодъяс вылӧ став государствояс видзӧны зэв уна сьӧм. 1925 воын гырысь государствояс со мыйта видзисны военнӧй рӧскодъяс вылӧ:

Япония 365 миллион шайт

Италия 303 „ „

Франция 670 „ „

Англия 1050 „ „

Америка 1040 „ „

Став военнӧй рӧскодъяссӧ кӧ торъя государствояслысь юкны олысьяс вылӧ, со мый лоӧ: Англияын быд морт вылӧ военнӧй рӧскодыс усьӧ 22 шайтӧн, Францияын 17 шайт, Япония 33 прӧчент (коймӧд пайсӧ) став государственнӧй доходсьыс видзӧ военнӧй рӧскодъяс вылӧ.

Сӧвет власьт оз кӧсйы воюйтны, рабочӧйяслы да крестьяналы оз ков война. Сӧвет правительство тӧждысьӧ ёнджыка овмӧс кыпӧдны да бурмӧдны. Сы вӧсна СССР-лӧн военнӧй рӧскодъясыс капиталист государствояс серти ёна ичӧтӧсь. 1925 воын СССР-лӧн военнӧй рӧскодыс вӧлі 760 миллион шайт, 20 прӧчент став государственнӧй рӧскодъяссьыс. Ӧти морт вылӧ миян военнӧй рӧскодыс усьӧ 5 шайтӧн; Эстонияын — 9 шайт, Латвияын — 10 шайт, Польшаын — 11 шайт.

Сідзкӧ военнӧй рӧскодыс миян капиталист государствояс серти ёна ичӧт.