ПАСЬКӦДАМӦЙ ГИЖӦД

Кӧкъямыс во нин петӧ Коми муын асланым газет. Сійӧ чуксаліс коми уджалысь войтырӧс водзӧ, бурлань мунны, няйтысь чеччыны, син восьтыны да повтӧг, ӧтувйӧн выль олӧм тэчны. Талун петӧ 1500-ӧд номер миян газетлӧн.

Дерт, унджык гижӧмыс вӧлі рочӧн. Неважӧн на кутім лэдзны комиӧн. Выль гижысь котыр вӧлисти на чужӧ. Му бердысь, вӧр пӧвстысь петӧны, кыптӧны коми гижысьяс. Паськалӧ, бурмӧ коми гижан кыв.

Газетыд ёнмӧ, артмӧ став крестьяна гижӧмӧн, отсалӧмӧн. Газетыд сӧмын сэки вына, кор сійӧ вӧчӧны, гижӧны сэтчӧ асьныс уджалысь йӧзыд. Ӧнія кадъясын газеттӧг овны оз позь. Петны югыдлань ми вермам сӧмын сэки, кор быд крестьянин кутас лыддьыны газет да гижны сэтчӧ ас олӧм йывсьыс.

Оз на миян быд ужалысь морт тӧд, кутшӧм ыджыд пӧльза вайӧ газетыд. Оз на коми войтыр кужны кутчысьны гижӧмад. Став Рочму пасьта быд во ӧні овлывлӧ гижӧмлӧн праздник лун (День печати). Тайӧ лунас ещӧ на ёнджыка уджалысьяс йитчӧны газетакӧд, сетӧны сылы отсӧг, индалӧны сылысь омӧльторъяссӧ.

Миян обласьтын тайӧ гижӧмлӧн праздник луныс таво лоӧ юнь 10-ӧд лунӧ (локтан четвергӧ). Велӧдчӧма, йӧз пӧвстын уджалысьяслы колӧ тайӧ лунас мичаӧ висьтавлыны крестьяналы — кутшӧм пӧльза налы вайӧ газета да нига, кыдзи гижӧд отсалӧ кыпӧдны овмӧс, бырӧдны пемыдлун. Сэсся колӧ висьтавны селькоръяслысь уджалӧм йылысь, кыдзи найӧ аслас серамнас, гижӧднас бырӧдӧны, вуштӧны лёк олӧмсӧ.

Газетӧ гижысьяслы да крестьяналы колӧ сёрнитны — кыдзи бурджыка вермасьны гижӧд пыр кооперативъясын сьӧм лотайтӧмӧн, бырӧдны ковтӧм рӧскодъяс, кыпӧдны му-видз уджалӧм, лӧсьӧдны бура сӧветъяслысь уджсӧ.

Тайӧ лунас колӧ видзӧдлыны: лӧсьӧдӧма-ӧ аслад сиктын газетлы отсасян кружок, кымын морт пырис сэтчӧ, кутшӧма паськалӧ газетаяс, мыйджык сёрнитлӧны кружокас, кутшӧма уджалӧ стенӧ ӧшӧдан газета, мый йылысь гижалӧны сэтчӧ да «Коми сиктӧ». Абу кӧ лӧсьӧдӧма кружоктӧ да стенӧ ӧшӧдан газеттӧ, сійӧ колӧ ӧдйӧджык вӧчны.

Ми омӧля на разӧдам крестьяна пӧвстӧ ассьыным газетъясӧс. Тиражыс «Коми сикт»-лӧн да «Югыд туй»-лӧн зэв на ичӧт. Доныс газетъяслӧн эськӧ абу нин ыджыд. Сідзжӧ омӧля паськалӧ нигаяс. Колӧ том йӧзлы, комсомолечьяслы, селькоръяслы, учительяслы чорыда, дугдывтӧг нуӧдны тайӧ уджсӧ. Медся ёна колӧ кутчысьлыны разӧдны газет да нига локтан юнь 10-ӧд лунӧ. Ми тшӧктылім: мед быд газет судзӧдысь тайӧ лун кежлӧ корсяс выль подписчикӧс. Тайӧ тшӧктӧм оз ков вунӧдны.

Гижӧмлӧн праздник лунӧ миян воссяс обласьтувса селькоръяслӧн съезд. Сэні лоӧ уна сёрни — кыдзи бурмӧдны ассьыным газетъяс, матӧдны крестьянаӧс газет бердӧ. Водзӧ вылӧ коми гижӧд кутас паськавны, ёнмыны.