ӦТА-МӦДӦС ПЫДДИ ПУКТӦМӦН

Выль во водзвылын миян корреспондентъяс шыӧдчылісны ӧткымын морт дінӧ да корисны вочавидзны, мый кажитчис налы тӧдчанаӧн 1990 воын странаса, Россияса, Коми республикаса да асланыс олӧмын да мый виччысьӧны локтан восяньыс.

Неыджыд воча кывъяссӧ лыддьӧй газетлӧн лист бокъясысь.

Сыктывдін районысь Придаш сельсӧвет исполкомса председатель Николай Михайлович Оплеснин.

— Медводз, пасъя, мый и Россия, и Коми республика рынок вылӧ вуджан кадӧ паныдасисны уна сьӧкыдлунӧн, кодъяс, чайта, быдӧнлы бура тӧдсаӧсь. Венны найӧс ковмас ӧтвылысь.

Выльтор лои и аслам олӧмын. Выльгортысь, кӧні вӧлі школаса директорӧн, бӧр лэччи Придашӧ. Тавося апрель 8 лунсянь уджала тані сельсӧвет исполкомса председательӧн (водзті некымын во вӧлі нин тайӧ удж вылас).

Ӧнія сьӧкыдлунъяс вылӧ видзӧдтӧг век жӧ сиктлӧн чужӧмбаныс бурланьӧ вежсьӧ. Ӧд Придаш, Проньдор да Ипать сиктъяс пырисны сійӧ дас куим лыдас, кодъясӧс шуӧма комплекснӧя выльмӧдны РСФСР-са Коми рескомлӧн да Коми ССР-са Министръяс Сӧветлӧн решение серти.

Ипатьӧдз нюжаліс асфальт. Видз-му овмӧсын уджалысьяслы стрӧитӧма сизим коттедж. Вевт улӧ воис дас кӧкъямыс квартираа олан керка. Лӧсьӧдӧны выль средньӧй школалы фундамент. Вӧчӧма нин 1 миллион шайт дон удж. Сэсся и асьныс йӧзыс стрӧитчыны босьтчисны. Проньдорын татшӧмыс кык да Придашын вит семья.

Бӧр кутісны локны татчӧс сикт-грездын вӧвлӧм олысьяс. Чайта, мый удайтчас бӧр ловзьыны Пожӧг вожлы.

Ёна виччыся, мый 1991 восянь кутасны уджавны выль законъяс. Надейтча и сы вылӧ, мый Горбачев да Ельцин ёртъяс велӧдчасны ставсӧ вӧчны ӧта-мӧдсӧ гӧгӧрвоӧмӧн. Татӧг водзӧ воськовъяс сьӧкыд виччысьны. Зэв ёна эска, мый миян киссьӧм народнӧй овмӧслы отсалас бӧр кыпӧдчыны выльмӧдӧм Союз. Татӧг оз позь. Ӧд и миян сизим чой-воклӧн семьяясын некымын сёрниа войтыр, но ставӧн олӧны дружнӧя, ӧта-мӧдӧс пыдди пуктӧмӧн. Сідзжӧ и дзоньнас государствоын колӧ.