МЕД ВӦЛІ РАДЛУН

1991 волӧн первой вежонӧ нёль тысяча сайӧ лыддьысьысьлы воас «Республика» еженедельниклӧн медводдза номер. Сӧмын на чужӧм журналистскӧй коллективӧс чолӧмалам нимлунӧн да сиам олӧмӧ паськыд туй.
Тӧдмасьӧй: юксьӧ мӧвпъясӧн выль газетса медводдза редактор Нелли Николаевна Мурыгина.

— Россияса да республикаса парламент примитісны 1990 воын решениеяс, кодъяс збыльысь вермасны вежны уна йӧзлысь олӧмсӧ. Думайта, историяын пасӧн лоасны «Коми ССР-лӧн государственнӧй суверенитет йылысь» декларация, «Вӧр йылысь закон», «Коми ССР-ын собственность йылысь закон». Ме шуа «вермисны вежны» сы вӧсна, мый ӧні, асьныд аддзанныд, мунӧ законъяслӧн война, вошӧ дӧверие власть дорӧ да сылӧн документъяс дорӧ. Чайта, оз сюр семья, кӧні эськӧ эз тӧдчыны кольысь воыслӧн сьӧкыдлунъясыс, босьтны кӧть экономика, кӧть нравственность.

Татшӧм обстановкаын эз ӧткодя йӧзыс примитны Коми ССР-са Верховнӧй Сӧветлысь решение — лӧсьӧдны ассьыс газет. Сылӧн нимыс гора, но та вӧсна и унатор миянсянь виччысьӧны. Эска, газетыс колӧ, но мед сійӧ лоис бӧрйысьысьяслӧн ёртӧн. Мед найӧ висьталісны сэні став тшупӧдысь депутатъяслӧн удж йылысь ассьыныс мӧвпъяссӧ. Ме дыр уджалі «Красное знамя» республиканскӧй газетлӧн сӧветскӧй строительство отделын. Верма шуны: властьяс да бӧрйысьысьяс ӧта-мӧдсӧ оз век гӧгӧрвоны. Тайӧ тшӧкыда овлӧ, кор йӧз оз тӧдны, мый вӧчӧны Сӧветъяс, исполнительнӧй власть. «Республикалӧн» главнӧй могыс сыын, медым бырӧдны тайӧ ӧтдортчӧмсӧ, властьӧс да став йӧзӧс матыстны ёрта-ёрт дорас.

Кӧсъя, медым выль воын миян перестроечнӧй законъяс кутісны уджавны да сетісны тыдалана водзӧс, медым найӧ отсалісны миянлы индыны туйвизьяс. Та сайын тшӧтш, кытчӧ кутас синны Коми республиканым, кыдзи кутас овсьыны сэні уна национальностя войтырлы.